नाशिक, (प्रतिनिधी) २९ सप्टेंबर - दारू पिण्यासाठी पैसे देण्यास नकार दिल्याच्या रागातून दोघा भामट्यांनी एका चहा विक्रेत्यावर धारदार चॉपरने प्राणघातक हल्ला केल्याची अत्यंत धक्कादायक घटना नाशिकरोड बस स्थानकासमोरील वर्दळीच्या परिसरात घडली. चहा विक्रेत्याने वेळीच प्रसंगावधान राखत वार चुकवल्यामुळे सुदैवाने मोठी जीवितहानी टळली असून, या घटनेत संशयितांनी चहाच्या टपऱ्यांची तोडफोड करत परिसरात दहशत निर्माण केली. या प्रकरणी नाशिकरोड पोलीस ठाण्यात गुन्हा दाखल करण्यात आला आहे.
नेमके काय घडले?
सावरकर नगर, जेलरोड येथील रहिवासी किशोर बापू गवळी यांचा नाशिकरोड बस स्थानकासमोर चहा विक्रीचा व्यवसाय आहे. सोमवारी (दि. २८) पहाटेच्या सुमारास गवळी नेहमीप्रमाणे आपल्या चहाच्या टपरीवर काम करत होते.
त्याच वेळी संशयित आरोपी सनी भाटीया आणि भिमा श्रीवंत (दोघे रा. सुभाष रोड, नाशिकरोड) हे गवळी यांच्या चहाच्या गाडीजवळ आले. त्यांनी गवळी यांच्याकडे दारू पिण्यासाठी पैशांची अवाजवी मागणी केली. गवळी यांनी पैसे देण्यास स्पष्ट नकार दिला.
चॉपरचा वार चुकवला, शेजारील दुकानांची तोडफोड
पैसे देण्यास नकार दिल्याने संतप्त झालेल्या दोन्ही संशयितांनी गवळी यांना अश्लील शिवीगाळ करत लाथाबुक्क्यांनी बेदम मारहाण करण्यास सुरुवात केली. मारहाणीदरम्यान संशयित सनी भाटीया याने स्वतःच्या कमरेला लावलेला तीक्ष्ण चॉपर बाहेर काढला आणि गवळी यांच्या दिशेने प्राणघातक वार केला. गवळी यांनी तत्परता दाखवत वार चुकवल्याने ते बालंबाल बचावले.
हा प्रकार पाहून शेजारील इतर चहा विक्रेते गवळी यांच्या मदतीसाठी धावून आले. मात्र, दोन्ही संशयितांनी त्यांनाही जिवे मारण्याची धमकी दिली आणि परिसरात आरडाओरडा करत चहाच्या टपऱ्यांचे मोठे नुकसान केले.
पोलिसांत गुन्हा दाखल
या घटनेनंतर भीतीचे वातावरण निर्माण झाले होते. पीडित व्यावसायिक किशोर गवळी यांनी तात्काळ नाशिकरोड पोलीस ठाणे गाठून फिर्याद दिली. गवळी यांच्या फिर्यादीवरून संशयित आरोपी सनी भाटीया आणि भिमा श्रीवंत यांच्याविरोधात गुन्हा दाखल करण्यात आला असून, पुढील तपास पोलीस हवालदार अमर गायकवाड करत आहेत.