नांदेड, (प्रतिनिधी) २२ नोव्हेंबर - राज्याच्या राजकारणात आपल्या स्पष्टवक्तेपणामुळे नेहमीच चर्चेत राहणारे अन्न व नागरी पुरवठा मंत्री नरहरी झिरवाळ पुन्हा एकदा आपल्या विधानांमुळे वादाच्या आणि चर्चेच्या केंद्रस्थानी आले आहेत. नांदेड जिल्ह्यातील हिमायतनगर तालुक्यातील वाळकेवाडी येथे एका कार्यक्रमासाठी आले असता त्यांनी माध्यमांशी संवाद साधला. यावेळी त्यांनी पक्षाच्या कार्यपद्धतीपासून ते राज्याच्या आर्थिक स्थितीपर्यंत विविध मुद्द्यांवर थेट भाष्य केले. विशेषतः राष्ट्रवादी काँग्रेस पक्षाच्या 'घड्याळ' चिन्हाचा संदर्भ देत त्यांनी केलेले विधान सध्या राजकीय वर्तुळात उलटसुलट चर्चांना जन्म देत आहे.
'अजितदादा गेल्यापासून घड्याळ थोडं मागे-पुढे होतंय'
दिवंगत उपमुख्यमंत्री अजित पवार यांच्या अपघाती निधनानंतर राष्ट्रवादी काँग्रेसची सूत्रे उपमुख्यमंत्री सुनेत्रा पवार यांच्याकडे आली आहेत. या बदलाच्या पार्श्वभूमीवर बोलताना नरहरी झिरवाळ यांनी पक्षाच्या सद्यस्थितीवर सूचक वक्तव्य केले. "अजितदादा पवार हयात असताना पक्षाचे घड्याळ कधीही एक मिनिटही मागे-पुढे होत नव्हते; मात्र अजितदादा गेल्यापासून ते थोडे मागे-पुढे होत आहे," असे झिरवाळ यांनी स्पष्टपणे सांगितले. मात्र, सोबतच त्यांनी "घड्याळ थोडे मागे-पुढे होत असले तरी ते व्यवस्थित सुरू आहे," असे म्हणत परिस्थिती नियंत्रणात असल्याचा दावाही केला. दुसरीकडे, दोन्ही राष्ट्रवादी गटांच्या संभाव्य विलिनीकरणाच्या चर्चांवर नेत्यांच्या भेटीगाठी सुरू असतानाच झिरवाळ यांनी केलेल्या या विधानाचे नेमके राजकीय अर्थ काय, याची चर्चा रंगली आहे.
लाडकी बहीण योजनेमुळे सरकारची कसरत
बिरसा मुंडा यांच्या पूर्णाकृती पुतळ्याचे दर्शन घेतल्यानंतर झिरवाळ यांनी राज्याच्या तिजोरीवरील ताणाबाबतही मोकळेपणाने मत मांडले. महिलांना दरमहा १५०० रुपये देणारी 'मुख्यमंत्री माझी लाडकी बहीण' योजना राबवताना सरकारची मोठी कसरत होत असल्याचे त्यांनी मान्य केले. "सध्याच्या घडीला या योजनेमुळे सरकारची अवस्था 'धरलं तर चावतंय आणि सोडलं तर पळतंय' अशी झाली आहे," असे रोखठोक निरीक्षण त्यांनी नोंदवले. या योजनेच्या आर्थिक भारामुळे प्रशासन आणि सरकारला निधीचे नियोजन करताना तारेवरची कसरत करावी लागत असल्याची कबुलीच त्यांनी यातून दिली.
संभाव्य दुष्काळाचे आव्हान आणि निधीची गरज
केवळ योजनांचा भारच नव्हे, तर संभाव्य दुष्काळाच्या शक्यतेमुळेही राज्यासमोर आर्थिक आव्हान उभे राहू शकते, असा इशारा झिरवाळ यांनी दिला. १९७२ च्या दुष्काळाचा दाखला देत ते म्हणाले की, आज देशात आणि राज्यात अन्नाची टंचाई राहिलेली नाही; परंतु पिण्याच्या पाण्याचा प्रश्न गंभीर बनला, तर टँकर, रेल्वे किंवा विमानाने पाणी पोहोचवण्यासारख्या उपाययोजनांसाठी मोठ्या प्रमाणावर निधी खर्च करावा लागेल. त्यामुळे यंदाच्या आणि पुढच्या वर्षीही काहीशी आर्थिक चणचण भासू शकते, असा अंदाज त्यांनी व्यक्त केला. मात्र, संकटकाळात जनतेच्या मदतीसाठी सरकार कुठेही मागे पडणार नाही, असा विश्वासही त्यांनी दिला.
नरहरी झिरवाळ यांच्या या विधानांमुळे एकीकडे महायुती सरकारमधील आर्थिक नियोजनाच्या मुद्द्याला हवा मिळाली आहे, तर दुसरीकडे राष्ट्रवादी काँग्रेसमधील अंतर्गत स्थितीवरही नव्याने चर्चा सुरू झाली आहे. या वक्तव्यांचे पडसाद आगामी काळात कसे उमटतात, याकडे सर्वांचे लक्ष लागले आहे.