नाशिक, (प्रतिनिधी) १३ सप्टेंबर - प्रशासकीय निष्काळजीपणा आणि कंत्राटदाराच्या हलगर्जीपणामुळे नाशिकमध्ये एका ३३ वर्षीय निष्पाप तरुणाला आपला जीव गमवावा लागल्याची अत्यंत संतापजनक घटना घडली आहे. सिद्धार्थ दत्तात्रय गोरे (वय ३३, रा. साई रिद्धी रो-हाउस, साईग्राम, अंबड) असे या अपघातात मृत्यू झालेल्या दुर्दैवी तरुणाचे नाव आहे. या घटनेमुळे नाशिककरांमधून प्रचंड संताप व्यक्त होत असून, मृत सिद्धार्थ यांच्या नातेवाईकांनी थेट नाशिक महानगरपालिकेच्या गेटवर मृतदेह आणून ठिय्य मांडला आणि प्रशासनाला घेराव घातला.
नेमकी घटना काय घडली?
शनिवारी (१२ सप्टेंबर २०२६) रात्री सुमारे ११:३० वाजेच्या सुमारास सिद्धार्थ गोरे हे त्यांचे मित्र मनोज सूर्यवंशी यांच्यासोबत कामावरून दुचाकीने घरी परतत होते. सिद्धार्थनगर येथील कृषीनगर जोगिंग ट्रॅकजवळ पाण्याच्या पाईपलाईनचे काम सुरू होते. रात्रीची वेळ, त्यातच बारीक पाऊस आणि अंधार यामुळे रस्त्यावर आडवे टाकलेले काळे पाईप दुचाकीस्वारांना दिसू शकले नाहीत. विशेष म्हणजे, संबंधित ठेकेदाराने किंवा प्रशासनाने त्या ठिकाणी कोणतेही सुरक्षेचे उपाय, रेडियम, रिफ्लेक्टर्स किंवा धोक्याची सूचना देणारे फलक लावले नव्हते.
अंधारात सुरक्षेच्या उपायांचा अंदाज न आल्यामुळे सिद्धार्थ यांची दुचाकी थेट रस्त्यावरील पाईपवर जाऊन जोरात धडकली. या भीषण अपघातात सिद्धार्थ यांच्या डोक्याला गंभीर दुखापत होऊन ते जागीच बेशुद्ध झाले. त्यांचे भाऊ प्रवीण गोरे यांनी त्यांना तात्काळ उपचारासाठी 'CHW' (सिव्हिल हॉस्पिटल) येथे दाखल केले. मात्र, उपचारादरम्यान १३ सप्टेंबर रोजी पहाटे २:०५ वाजता डॉक्टरांनी त्यांना मृत घोषित केले.
चिमुकल्या मुलींचे छत्र हरपले
अपघातात दुर्दैवी मृत्यू झालेल्या सिद्धार्थ गोरे यांच्या पश्चात अवघ्या ६ महिन्यांची आणि २ वर्षांची अशा दोन अत्यंत लहान मुली, पत्नी व संपूर्ण कुटुंब आहे. ठेकेदाराच्या आणि प्रशासनाच्या अक्षम्य निष्काळजीपणामुळे या निष्पाप चिमुकल्यांचे पित्याचे छत्र कायमचे हरपले आहे, ज्यामुळे परिसरातून हळहळ व्यक्त केली जात आहे.
ठेकेदार, मनपा आयुक्त अन् शहर अभियंत्यावर गुन्हे दाखल करा!
या घटनेनंतर गोरे कुटुंब आणि नाशिककरांच्या संतापाचा उद्रेक झाला. रस्त्यावर सुरु असलेल्या कामा ठिकाणी सुरक्षा नियम पायदळी तुडवणाऱ्या पाईपलाईन ठेकेदारासह नाशिक महानगरपालिकेचे शहर अभियंता, मनपा आयुक्त आणि कुंभमेळा आयुक्त यांच्यावरही या अपघातास जबाबदार धरून तात्काळ गुन्हे दाखल करण्याची मागणी नातेवाईकांनी केली आहे.
"रस्त्यावर काम करताना साधे रिफ्लेक्टर लावण्याचे सौजन्य ठेकेदाराने दाखवले नाही. ठेकेदार कंपनी असो वा तिचे एमडी (MD), संचालक किंवा नाशिक प्लांट हेड — या सर्व दोषींवर ३०२ सदोष मनुष्यवधाचा गुन्हा दाखल झाल्याशिवाय आणि मृत व्यक्तीला न्याय मिळाल्याशिवाय माघार घेणार नाही," असा आक्रमक पवित्रा नातेवाईकांनी घेतला आहे.
सध्या नाशिक महापालिका मुख्यालयासमोर तणावाचे वातावरण असून, पोलिसांचा मोठा ताफा तैनात करण्यात आला आहे. पालिका प्रशासन आता या निष्काळजीपणावर काय कारवाई करते, याकडे संपूर्ण नाशिक शहराचे लक्ष लागले आहे.
