नवी दिल्ली, (प्रतिनिधी) ६ सप्टेंबर - राजधानी दिल्लीतील सत्य निकेतन परिसरात दुपारी दीड वाजेच्या सुमारास दोन बहुमजली इमारती अचानक कोसळल्याने मोठी दुर्घटना घडली. कोसळलेल्या इमारतींमध्ये 'हॉस्टेल डेज' नावाच्या मुलांच्या एका वसतिगृहाचा (पीजी) समावेश आहे. अपघाताच्या वेळी अनेक विद्यार्थी आपापल्या खोल्यांमध्ये हजर होते. ढिगाऱ्याखालून आतापर्यंत तिघांना सुरक्षित बाहेर काढण्यात यश आले असून, अजूनही अनेक विद्यार्थी ढिगाऱ्याखाली अडकल्याची भीती व्यक्त होत आहे.
प्रत्यक्षदर्शींच्या म्हणण्यानुसार, दुर्घटनाग्रस्त 'हॉस्टेल डेज' पीजीमध्ये केवळ मुले राहात होती. इमारत कोसळली तेव्हा बहुतांश मुले आत खोल्यांमध्येच होती. पीजीच्या नोंदणी वहीची (रजिस्टर) तपासणी झाल्यानंतरच आत नेमके किती विद्यार्थी होते याची अधिकृत संख्या स्पष्ट होऊ शकेल. प्राथमिक माहितीनुसार, काही विद्यार्थी गंभीर जखमी झाले असून त्यांच्यावर उपचारासाठी व्यवस्था केली जात आहे.
दुपारी दीड वाजता घडली दुर्घटना
प्रत्यक्षदर्शींनी दिलेल्या माहितीनुसार, दुपारी १:३० वाजता 'हॉस्टेल डेज' ही पीजीची इमारत कोसळली आणि तिच्या शेजारील दुसरी इमारतही तिच्यासोबत पत्त्यासारखी खाली आली. या घटनेमुळे परिसरात प्रचंड धुरळा आणि एकच गोंधळ उडाला. इमारतीखाली काही वाहनेही दबली गेली आहेत. सुरक्षेचा उपाय म्हणून प्रशासनाने परिसरातील लगतच्या सर्व इमारती तातडीने रिकाम्या केल्या आहेत.
नोंदणी वहीवरून अडकलेल्यांची संख्या स्पष्ट होणार
प्रत्यक्षदर्शींच्या म्हणण्यानुसार, दुर्घटनाग्रस्त 'हॉस्टेल डेज' पीजीमध्ये केवळ मुले राहात होती. इमारत कोसळली तेव्हा बहुतांश मुले आत खोल्यांमध्येच होती. पीजीच्या नोंदणी वहीची (रजिस्टर) तपासणी झाल्यानंतरच आत नेमके किती विद्यार्थी होते याची अधिकृत संख्या स्पष्ट होऊ शकेल. प्राथमिक माहितीनुसार, काही विद्यार्थी गंभीर जखमी झाले असून त्यांच्यावर उपचारासाठी व्यवस्था केली जात आहे.
अरुंद रस्त्यांमुळे बचावकार्यात अडथळा; स्थानिक धावले मदतीला
घटनेची माहिती मिळताच अग्निशमन दल आणि आपत्ती व्यवस्थापन पथके घटनास्थळी दाखल झाली. मात्र, सत्य निकेतन परिसरातील रस्ते अरुंद असल्याने अवजड यंत्रसामग्री पोहोचण्यास अडथळे येत आहेत. प्रशासकीय पथके पोहोचण्यापूर्वीच स्थानिक नागरिकांनी हातोडे आणि हातांनी विटा-माती बाजूला सारून ढिगारा हटवण्याचे काम सुरू केले. युद्धपातळीवर बचावकार्य सुरू असून अडकलेल्या विद्यार्थ्यांना लवकरात लवकर बाहेर काढण्याचे प्रयत्न सुरू आहेत.
"अत्यंत दुःखद घटना" — आमदार अनिल शर्मा
या दुर्घटनेवर स्थानिक भाजप आमदार अनिल शर्मा यांनी तीव्र दुःख व्यक्त केले. "वेगवेगळ्या शहरांतून विद्यार्थी येथे शिक्षणासाठी येतात आणि अशा पीजीमध्ये राहतात. ही अत्यंत दुर्दैवी घटना आहे. आत ५, १० की २० विद्यार्थी अडकले आहेत हे आत्ताच सांगणे कठीण आहे, मात्र विद्यार्थी आत ढिगाऱ्याखाली अडकले आहेत हे निश्चित," असे सांगत त्यांनी तातडीच्या मदतकार्यावर लक्ष केंद्रित केले जात असल्याचे नमूद केले.
