नवी दिल्ली, (प्रतिनिधी) ५ सप्टेंबर - परीक्षा व्यवस्थेतील गैरप्रकार आणि धांधलीविरोधात आवाज उठवणाऱ्या बिहारमधील विद्यार्थ्यांवर झालेल्या कथित पोलिस कारवाईवरून काँग्रेस नेते राहुल गांधी यांनी बिहार सरकार आणि भाजपवर जोरदार निशाणा साधला आहे. "युवकांचा आवाज दाबणाऱ्या प्रत्येक शक्तीला एक दिवस जनतेसमोर उत्तर द्यावेच लागेल आणि तो दिवस आता दूर नाही," असा थेट इशारा त्यांनी दिला आहे.
राहुल गांधी यांनी नुकतीच पोलिसांच्या लाठीमार आणि गोळीबारात जखमी झालेल्या विद्यार्थी व तरुणांची भेट घेऊन त्यांच्याशी संवाद साधला. या भेटीनंतर त्यांनी सोशल मीडियाद्वारे आपली तीव्र प्रतिक्रिया व्यक्त केली.
'लष्करात जाण्याचे स्वप्न बाळगणाऱ्या तरुणाचा पाय मोडला'
या घटनेतील भीषणतेचा उल्लेख करत राहुल गांधी म्हणाले की, "परीक्षेत पारदर्शकता आणि रोजगाराची योग्य संधी मागणाऱ्या निष्पाप तरुणांवर पोलिसांकडून भयंकर क्रूरता दाखवली गेली. लाठीमार, पिस्तूल आणि AK-47 मधून गोळीबार करण्यात आला, ज्यामध्ये अनेक विद्यार्थी गंभीर जखमी झाले आहेत. लष्करात जाऊन देशसेवा करण्याचे स्वप्न पाहणाऱ्या एका तरुणाला गोळी मारून त्याचा पाय मोडण्यात आला आणि त्याचे संपूर्ण स्वप्न धुळीस मिळवण्यात आले."
'लहान अधिकाऱ्यांना बळीचा बकरा बनवून सरकार सुटू शकत नाही'
"विद्यार्थी केवळ त्यांच्या हक्कांची आणि पारदर्शक परीक्षेची मागणी करत होते, मग त्यांच्यावर लाठ्या आणि गोळ्या झाडण्याची गरजच काय होती?" असा सवाल त्यांनी उपस्थित केला. या कारवाईची जबाबदारी केवळ काही छोट्या अधिकाऱ्यांवर ढकलून सरकारला निसटता येणार नाही. ही घटना एकतर वरिष्ठांच्या आदेशाचा परिणाम आहे किंवा सत्तेचे मोठे अपयश आहे, असा आरोपही राहुल गांधी यांनी केला.
'मी विद्यार्थ्यांच्या पाठीशी ठामपणे उभा'
बिहार सरकारला थेट इशारा देत राहुल गांधी यांनी स्पष्ट केले की, "बिहार सरकार काहीही करो, मी या पीडित युवकांच्या पाठीशी ठामपणे उभा आहे आणि त्यांना शक्य ती सर्व मदत करण्यास कटिबद्ध आहे."
दरम्यान, या घटनेनंतर बिहारमधील राजकीय वातावरण चांगलेच तापले असून विरोधी पक्षांकडून सरकारविरोधात तीव्र संताप व्यक्त केला जात आहे. #ChhatronKiGoonj या हॅशटॅगसह सोशल मीडियावरही या घटनेचे तीव्र पडसाद उमटत आहेत.