नाशिक, (प्रतिनिधी) २६ ऑगस्ट - राज्य शासनाच्या 'पुण्यश्लोक अहिल्यादेवी होळकर शेतकरी कर्जमुक्ती योजना-२०२६' अंतर्गत नाशिक जिल्ह्यातील शेतकऱ्यांना मोठा आर्थिक दिलासा मिळाला आहे. योजनेच्या दुसऱ्या टप्प्यात जिल्ह्यातील ९ हजार ७३१ पात्र शेतकरी लाभार्थ्यांच्या बँक खात्यात ८६ कोटी ५१ लाख रुपयांची रक्कम थेट वर्ग करण्यात आली आहे. जिल्हाधिकारी तथा जिल्हास्तरीय समितीचे अध्यक्ष आयुष प्रसाद आणि जिल्हा उपनिबंधक कुंदन भोळे यांनी ही माहिती दिली.
आतापर्यंत २६०.२१ कोटींचा प्रत्यक्ष लाभ
या योजनेच्या पहिल्या व दुसऱ्या टप्प्याद्वारे जिल्ह्यातील हजारो शेतकऱ्यांना कर्जमुक्तीचा लाभ मिळाला आहे:
पहिला टप्पा (७ ऑगस्ट): जिल्ह्यातील २० हजार ३४१ शेतकऱ्यांना १७३ कोटी ६९ लाख ९३ हजार २८७ रुपयांचा लाभ देण्यात आला. (यात जिल्हा बँकेच्या १२,३११ तर व्यापारी बँकांच्या ८,०३० शेतकऱ्यांचा समावेश होता.)
दुसरा टप्पा (२४ ऑगस्ट): ९ हजार ७३१ शेतकऱ्यांना ८६ कोटी ५१ लाख रुपये वर्ग करण्यात आले. यामध्ये नाशिक जिल्हा मध्यवर्ती सहकारी बँकेच्या ४,८५६ शेतकऱ्यांना ३४.९२ कोटी, तर व्यापारी बँकांच्या ४,८७५ शेतकऱ्यांना ४५.५७ कोटी रुपये मिळाले.
एकूण वाटप: दोन्ही टप्पे मिळून आतापर्यंत नाशिक जिल्ह्यातील ३० हजार ७२ पात्र शेतकऱ्यांच्या खात्यावर एकूण २६० कोटी २१ लाख रुपये जमा झाले आहेत.
आधार प्रमाणीकरण तातडीने पूर्ण करण्याचे आवाहन
जिल्ह्यातील पहिल्या यादीतील ३५ हजार ६४२ पात्र शेतकऱ्यांपैकी ३१ हजार ९५६ जणांचे आधार प्रमाणीकरण पूर्ण झाले असून, ३ हजार ८८६ शेतकऱ्यांचे प्रमाणीकरण अद्याप बाकी आहे.
ज्या शेतकऱ्यांचे प्रमाणीकरण शिल्लक आहे, त्यांनी तातडीने जवळच्या 'आपले सरकार' किंवा 'ई-सेवा' केंद्रावर जाऊन मोफत प्रमाणीकरण करून घ्यावे. तसेच पोर्टलवर कर्जखाते किंवा रकमेसंदर्भात तक्रार नोंदवलेल्या शेतकऱ्यांचे निवारण ऑनलाइन सुरू असून, अशा शेतकऱ्यांनी आवश्यक कागदपत्रांसह संबंधित बँक शाखा अथवा जिल्हा उपनिबंधक कार्यालयाशी संपर्क साधावा, असे आवाहन जिल्हा प्रशासनाने केले आहे.
