नवी दिल्ली, (प्रतिनिधी) ५ ऑगस्ट - गेल्या ३ वर्षांहून अधिक काळ प्रलंबित असलेला शिवसेना पक्ष, निवडणूक चिन्ह 'धनुष्यबाण' आणि आमदारांच्या अपात्रतेचा वाद आता अंतिम टप्प्यात पोहचला आहे. सर्वोच्च न्यायालयात या महत्त्वपूर्ण प्रकरणावर आज (बुधवारी) दुपारी २ वाजता सुनावणी होणार आहे. सरन्यायाधीश सूर्यकांत, न्यायमूर्ती जॉयमला बागची आणि न्यायमूर्ती व्ही. मोहना यांच्या विशेष खंडपीठासमोर हे कामकाज पार पडणार आहे.
मंगळवारी होणारी सुनावणी वरिष्ठ वकील कपिल सिब्बल यांनी युक्तिवादाच्या तयारीसाठी अतिरिक्त वेळ मागितल्याने आज दुपारी निश्चित करण्यात आली.
सुनावणीतील महत्त्वाचे मुद्दे व घडामोडी
कपिल सिब्बल यांचा युक्तिवाद: ठाकरे गटाकडून ज्येष्ठ विधिज्ञ कपिल सिब्बल अंतिम युक्तिवाद मांडतील. "केवळ आमदार फुटले म्हणजे मूळ पक्ष त्यांचा होत नाही. निवडणूक आयोगाने विधिमंडळातील संख्याबळ पाहिले, पण पक्षाच्या संघटनेतील बहुमताकडे दुर्लक्ष केले," असा मुख्य युक्तिवाद त्यांनी कोर्टात मांडला आहे.
अपात्रतेचा निर्णय व आव्हान: केंद्रीय निवडणूक आयोगाने एकनाथ शिंदे गटाला अधिकृत 'शिवसेना' नाव व 'धनुष्यबाण' चिन्ह देण्याच्या निर्णयाविरोधात उद्धव ठाकरे यांनी सर्वोच्च न्यायालयात आव्हान याचिका दाखल केली आहे. तसेच, विधानसभा अध्यक्षांनी शिंदे गटातील आमदारांना अपात्र न ठरवल्याच्या निर्णयाविरोधात ठाकरे गटाचे मुख्य प्रतोद सुनील प्रभू यांनी स्वतंत्र याचिका दाखल केली आहे.
वेळेची मागणी: सरन्यायाधीशांसोबत झालेल्या चर्चेदरम्यान सिब्बल यांनी दुपारी २ वाजता प्राधान्याने वेळ देण्याची विनंती न्यायालयाला केली, जेणेकरून सुनावणीला गती मिळेल.
निर्णयाकडे राजकीय वर्तुळाचे लक्ष
जून २०२२ मध्ये एकनाथ शिंदे यांनी पक्षातील आमदारांसह केलेल्या बंडखोरीनंतर महाराष्ट्राच्या राजकारणाला मोठे वळण मिळाले होते. आता सर्वोच्च न्यायालय धनुष्यबाण चिन्ह गोठवणार, ते शिंदेंकडेच कायम ठेवणार की ठाकरेंना परत मिळणार, याकडे उपमुख्यमंत्री एकनाथ शिंदे आणि उद्धव ठाकरे यांच्यासह संपूर्ण महाराष्ट्राच्या राजकीय वर्तुळाचे लक्ष लागून राहिले आहे.
?s=20
