नाशिक, (प्रतिनिधी) ३१ जुलै - राज्य शासनाच्या महत्त्वाकांक्षी ‘पुण्यश्लोक अहिल्यादेवी होळकर शेतकरी कर्जमुक्ती योजना-२०२६’ अंतर्गत पात्र शेतकऱ्यांच्या कर्जमाफीची प्रक्रिया वेगाने सुरू आहे. महा-आयटीच्या संगणकीय प्रणालीद्वारे राज्यातील तब्बल १६.९६ लाख कर्जखात्यांची यादी आधार प्रमाणीकरणासाठी प्रसिद्ध करण्यात आली आहे. यामध्ये नाशिक जिल्ह्यातील ३५ हजार ८९० कर्जखात्यांचा समावेश असून, आधार प्रमाणीकरण पूर्ण होताच डीबीटी (DBT) द्वारे कर्जमाफीची रक्कम थेट खात्यात जमा होणार आहे.
जिल्हा उपनिबंधक (सहकारी संस्था) कुंदन भोळे यांनी दिलेल्या माहितीनुसार, या योजनेमध्ये कर्जमाफी, एकवेळ समझोता योजना (OTS) आणि नियमित परतफेड करणाऱ्यांसाठी प्रोत्साहनपर लाभ अशा तीन घटकांचा समावेश आहे.
कर्जमुक्ती योजनेची मुख्य वैशिष्ट्ये अन् अटी:
२ लाखांपर्यंत कर्जमाफी: ३० सप्टेंबर २०२५ पर्यंत थकीत राहून ३१ मार्च २०२६ पर्यंत परतफेड न झालेल्या २ लाख रुपयांपर्यंतच्या कर्जास पूर्ण कर्जमाफी दिली जाईल. २५ जुलै रोजी प्रसिद्ध झालेल्या यादीतील २ लाखांपर्यंतची रक्कम थेट शासन माफ करणार असून, यासाठी शेतकऱ्यांना बँकेत कोणतीही रक्कम जमा करावी लागणार नाही.
२ लाखांपेक्षा जास्त थकबाकी असल्यास: २ लाख रुपयांहून अधिक थकबाकी असलेल्या शेतकऱ्यांनी २ लाखांवरील अतिरिक्त रक्कम ३१ मार्च २०२७ पर्यंत बँकेत जमा केल्यास, त्यांना उर्वरित २ लाख रुपयांचा लाभ मिळेल.
५० हजार प्रोत्साहनपर अनुदान: सन २०२२-२३, २०२३-२४ आणि २०२४-२५ या तीन वर्षांपैकी कोणत्याही दोन वर्षांत पीक कर्ज वेळेत फेडणाऱ्या तसेच २०२५-२६ मधील कर्जाची मुदतीत परतफेड करणाऱ्या शेतकऱ्यांना ५० हजार रुपयांपर्यंत प्रोत्साहनपर अनुदान दिले जाणार आहे.
१ एप्रिल २०२६ नंतर व्याज नाही: १ एप्रिल २०२६ नंतर योजनेस पात्र ठरलेल्या कर्जखात्यांवर कोणत्याही प्रकारचे व्याज न आकारण्याचे निर्देश बँकांना देण्यात आले आहेत.
नाशिक जिल्ह्यातील ३५,८९० कर्जखात्यांचा समावेश
या योजनेसाठी बँकांनी राज्यभरातून ३१.१७ लाख खात्यांची माहिती सादर केली होती. पहिल्या टप्प्यात २ लाखांपर्यंत थकबाकी असलेल्या १६.९६ लाख खात्यांची यादी प्रसिद्ध झाली आहे. यामध्ये नाशिक जिल्ह्यातील:
जिल्हा मध्यवर्ती सहकारी बँक (NDCC): १८,३२७ खाती
व्यापारी बँका: १७,५६३ खाती
अशी एकूण ३५,८९० कर्जखाती पहिल्या यादीत समाविष्ट आहेत.
शेतकऱ्यांना महत्त्वाचे आवाहन:
याद्या ग्रामपंचायत, विकास संस्था, संबंधित बँक शाखा आणि जिल्हा उपनिबंधक कार्यालयात उपलब्ध आहेत. शेतकऱ्यांनी आपला आधार क्रमांक, कर्जखाता क्रमांक आणि कर्जाची रक्कम तपासून 'आधार प्रमाणीकरण' (Aadhaar Authentication) वेळेत पूर्ण करावे. २८ जुलैपर्यंत ३.९६ लाखांहून अधिक शेतकऱ्यांचे प्रमाणीकरण पूर्ण झाले आहे.
आधार प्रमाणीकरणानंतर कर्जमाफीची रक्कम खात्यात जमा होऊन खाते नियमित होईल, ज्यामुळे शेतकऱ्यांना नव्याने पीक कर्ज मिळण्याचा मार्ग मोकळा होईल, असे प्रशासनाने स्पष्ट केले आहे.
