नाशिक, (प्रतिनिधी) २६ जुलै - श्रीक्षेत्र कपिलधारा-कावनई या सिंहस्थ कुंभमेळ्याशी निगडित ऐतिहासिक व प्राचीन तीर्थक्षेत्राचा सर्वांगीण विकास, पर्यावरण संवर्धन आणि पायाभूत सुविधा निर्माण करण्यासाठी राज्य शासन पूर्णपणे कटिबद्ध आहे, अशी ग्वाही राज्याचे अन्न, नागरी पुरवठा व ग्राहक संरक्षण मंत्री छगन भुजबळ यांनी दिली.
इगतपुरी तालुक्यातील कावनई येथे आगामी सिंहस्थ महाकुंभाच्या पार्श्वभूमीवर आयोजित गंगा-गोदावरी पूजन सोहळा व विविध विकासकामांचे भूमिपूजन मंत्री भुजबळ यांच्या हस्ते मंत्रोच्चारात विधिवत पार पडले. त्यावेळी ते बोलत होते.
या प्रसंगी आमदार हिरामण खोसकर, शहापूरचे आमदार शांताराम मोरे, माजी मंत्री बबनराव घोलप, माजी आमदार शिवराम झोले, जिल्हा परिषदेच्या अतिरिक्त मुख्य कार्यकारी अधिकारी प्रतिभा संगमनेरे, महंत भक्तीचरणदास महाराज, महंत फलाहारीबाबा महाराज, महंत कल्कीराम महाराज यांच्यासह संत-महंत, स्थानिक लोकप्रतिनिधी व भाविक मोठ्या संख्येने उपस्थित होते.
प्रमुख मुद्दे आणि विकास आराखडा:
११६ कोटींची विकासकामे प्रगतीपथावर:
परिसरात रस्ते, सिमेंट काँक्रीटीकरण, तलाव विकास, इनर व आउटर रिंग रोडसह विविध पायाभूत सुविधांची ११६ कोटी रुपयांची विकासकामे सध्या सुरू असून उर्वरित कामेही टप्प्याटप्प्याने वेळेत पूर्ण केली जातील, असे भुजबळ यांनी सांगितले.
स्थानिक अर्थव्यवस्थेला चालना:
धार्मिक पर्यटनामुळे स्थानिक हॉटेल व्यवसाय, वाहतूक, पूजासाहित्य विक्रेते, व्यापारी आणि शेतकऱ्यांना मोठ्या प्रमाणावर रोजगाराच्या संधी मिळतात. त्यामुळे सर्वांनी 'अतिथी देवो भव' या भावनेने भाविकांचे स्वागत करावे, असे आवाहन त्यांनी केले.
पारदर्शक आणि दर्जेदार कामांचे निर्देश:
शासकीय अधिकारी व कर्मचाऱ्यांनी लोकाभिमुख दृष्टिकोन ठेवून सर्व विकासकामे दर्जेदार, पारदर्शक आणि वेळेत पूर्ण करावीत, अशा सक्त सूचना भुजबळ यांनी दिल्या.
वैष्णव अखाड्यांची मोठी मागणी:
या सोहळ्यात वैष्णव अखाड्याच्या प्रतिनिधींनी कपिलधारा येथील पारंपरिक स्नानाची तारीख १७ ऑगस्ट २०२७ अधिकृतपणे जाहीर करून, सिंहस्थ प्राधिकरणाच्या मुख्य नियोजनात या तीर्थक्षेत्राचा प्राधान्याने समावेश करण्याची मागणी केली.
पर्यावरण संवर्धनाचे आवाहन
जलस्रोत स्वच्छ, प्रदूषणमुक्त व निर्मळ ठेवणे ही सर्वांची जबाबदारी आहे. तीर्थक्षेत्रांच्या परिसरात कचरा न टाकता स्वच्छता राखावी आणि वृक्षारोपणाद्वारे पर्यावरणाचा समतोल राखावा, असे आवाहन मंत्री भुजबळ यांनी यावेळी केले.
आमदार हिरामण खोसकर यांनी सर्व संबंधित विभागांची संयुक्त बैठक घेऊन तीर्थक्षेत्र विकास आराखड्याची प्रभावी अंमलबजावणी करण्याची गरज व्यक्त केली.
