मुंबई, (प्रतिनिधी) १९ जुलै - राज्यातील शेती क्षेत्रात आधुनिक तंत्रज्ञान, कृत्रिम बुद्धिमत्ता (AI) आणि नाविन्यपूर्ण संकल्पनांना चालना देण्यासाठी राज्य सरकारने एक अत्यंत महत्त्वपूर्ण पाऊल उचलले आहे. आतापर्यंत मर्यादित स्वरूपात होणाऱ्या 'ॲग्री हॅकेथॉन' स्पर्धेला आता राज्यस्तरीय कायमस्वरूपी योजना म्हणून मान्यता देण्यात आली आहे, अशी माहिती कृषी मंत्री दत्तात्रय भरणे यांनी आज दिली. मुख्यमंत्री देवेंद्र फडणवीस यांनी केलेल्या घोषणेनुसार, या स्पर्धेतील सर्वोत्कृष्ट विजेत्याला दिवंगत उपमुख्यमंत्री अजित पवार यांच्या नावाने मुख्य पुरस्कार प्रदान केला जाणार असून, या संदर्भातील अधिकृत शासन निर्णय (GR) कृषी विभागाने निर्गमित केला आहे.
विजेत्यांना लाखोंची पारितोषिके
कृषी क्षेत्रातील संशोधक, स्टार्टअप्स, विद्यार्थी, अभियंते आणि कृषी शास्त्रज्ञांना प्रोत्साहन देण्यासाठी या कायमस्वरूपी योजनेअंतर्गत दरवर्षी मोठी पारितोषिके दिली जाणार आहेत:
प्रथम क्रमांक (मुख्य पुरस्कार): २५ लाख रुपये रोख
द्वितीय क्रमांक (उपविजेता): १५ लाख रुपये रोख
९ कृषी-हवामान विभागांना मिळणार समान संधी
राज्यातील शेतीमध्ये प्रादेशिक विविधतेनुसार असलेल्या समस्यांवर स्थानिक पातळीवरच तंत्रज्ञानाधारित उपाय शोधणे हा या योजनेचा मुख्य हेतू आहे.
चक्राकार पद्धतीने आयोजन: राज्यातील सर्व भागांना समान संधी मिळावी म्हणून महाराष्ट्रातील चारही कृषी विद्यापीठांच्या कार्यक्षेत्रात दरवर्षी आलटून-पालटून (चक्राकार पद्धतीने) या स्पर्धेचे आयोजन केले जाईल.
हवामानानुसार उपाययोजना: राज्यातील नऊही ॲग्रोक्लायमॅटिक झोनमधील (कृषी-हवामान विभाग) पिके, तेथील हवामान आणि स्थानिक अडचणी लक्षात घेऊन त्या-त्या भागासाठी प्रभावी आणि स्वस्त तंत्रज्ञान विकसित करण्यास यामुळे मदत होईल.
थेट शेतात होणार तंत्रज्ञानाची चाचणी
या योजनेचे स्वरूप केवळ कागदावर किंवा सादरीकरणापुरते मर्यादित नसून ते प्रत्यक्ष जमिनीवर उतरवले जाणार आहे.
दरवर्षी कृषी क्षेत्रातील महत्त्वाच्या अडचणींवर आधारित ‘प्रॉब्लेम स्टेटमेंट्स’ निश्चित केली जातील.
स्पर्धेतून पुढे आलेल्या आणि निवड झालेल्या सर्वोत्तम तंत्रज्ञानाची खरीप हंगामात थेट शेतकऱ्यांच्या शेतावर प्रत्यक्ष चाचणी घेतली जाईल.
कृषी विद्यापीठांमार्फत या तंत्रज्ञानाची पडताळणी (Verification) करून त्याचा संपूर्ण राज्यातील शेतीमध्ये व्यापक वापर करण्यावर भर दिला जाणार आहे.
महाराष्ट्र देशासाठी आदर्श निर्माण करेल - कृषी मंत्री
"पुण्यातील यशस्वी प्रयोगानंतर या योजनेचे संस्थात्मीकरण करण्यात आले आहे. यामुळे महाराष्ट्रातील कृषी क्षेत्र अधिक आधुनिक, तंत्रज्ञानसक्षम आणि भविष्योन्मुख होईल. शेतकऱ्यांच्या प्रत्यक्ष अडचणी सोडविणाऱ्या नवकल्पनांना प्रोत्साहन देण्यात महाराष्ट्र देशात आदर्श ठरेल."
— दत्तात्रय भरणे, कृषी मंत्री
