मुंबई, (प्रतिनिधी) १८ जुलै - ५G तंत्रज्ञान आणि डिजिटल कनेक्टिव्हिटीच्या जोरावर रिलायन्स जिओने दूरसंचार क्षेत्रातील आपले अव्वल स्थान अधिक भक्कम केले आहे. रिलायन्स इंडस्ट्रीजच्या जून २०२६ अखेर संपलेल्या तिमाही आर्थिक निकालांतून हे स्पष्ट झाले आहे. जिओचे True5G नेटवर्क वापरणाऱ्या ग्राहकांची संख्या आता तब्बल २८.५ कोटींवर पोहोचली असून, गेल्या अवघ्या वर्षभरात यामध्ये ७.३ कोटी नवीन ग्राहकांची भर पडली आहे. विशेष म्हणजे, जिओ नेटवर्कवरील ५G डेटा ट्रॅफिक आता ४G च्या सुमारे दीडपट झाला आहे.
डेटा वापरात विक्रमी वाढ
जिओ नेटवर्कवर ग्राहकांचा डेटा वापर झपाट्याने वाढत असल्याचे निकालांवरून स्पष्ट होते. जिओच्या प्रति ग्राहक मासिक डेटा वापराने ४३.७ GB चा टप्पा गाठला आहे. तसेच, तिमाहीतील एकूण डेटा ट्रॅफिकमध्ये वार्षिक आधारावर २६.९ टक्क्यांची मोठी वाढ झाली असून, तो ६९.४ अब्ज GB वर पोहोचला आहे. मोबाईल कनेक्टिव्हिटीच्या क्षेत्रातही जिओने या तिमाहीत ८९ लाख नवीन ग्राहक जोडले असून, कंपनीची एकूण ग्राहकसंख्या ५३.३३ कोटी झाली आहे.
होम ब्रॉडबँडमध्ये 'जिओ एअरफायबर'चा डंका
फिक्स्ड ब्रॉडबँड सेवेमध्येही जिओने बाजारातील आपला हिस्सा ४३ टक्क्यांहून अधिक केला आहे. जून २०२६ अखेर कंपनीचे एकूण फिक्स्ड ब्रॉडबँड ग्राहक २.८६ कोटींवर पोहोचले आहेत. गेल्या १२ महिन्यांत जोडल्या गेलेल्या ८६ लाख नवीन ग्राहकांपैकी तब्बल ७५ टक्क्यांहून अधिक वाटा एकट्या जिओ एअरफायबरचा आहे. सध्या जिओ एअरफायबरची ग्राहकसंख्या १.४ कोटींच्या पार गेली आहे.
आर्थिक कामगिरीही दमदार; EBITDA मार्जिन विक्रमी
ग्राहकांसोबतच जिओ प्लॅटफॉर्म्सची आर्थिक कामगिरीही मजबूत राहिली आहे.
निव्वळ नफा: वार्षिक आधारावर ९.२ टक्क्यांनी वाढून ₹७,७६४ कोटी झाला.
EBITDA: १५.१ टक्क्यांच्या वाढीसह ₹२०,८६५ कोटी या विक्रमी पातळीवर पोहोचला.
EBITDA मार्जिन: ५३.३ टक्के इतके विक्रमी नोंदवले गेले.
मोबाईल ५G, उच्च डेटा वापर आणि होम ब्रॉडबँड अशा तिन्ही आघाड्यांवर जिओने मिळवलेले हे यश भारतातील पुढील पिढीच्या डिजिटल क्रांतीमध्ये कंपनीचे वर्चस्व अधिक दृढ करणारे ठरले आहे.
