मनोहर शिंदे, (नाशिक) ११ जुलै - सिंहस्थ कुंभमेळा २०२७ च्या पार्श्वभूमीवर नाशिक आणि त्र्यंबकेश्वर शहरांत सुरू असलेल्या रस्ते विकास कामांची गुणवत्ता, टिकाऊपणा आणि सुरक्षितता सर्वोच्च दर्जाची असावी, यासाठी नाशिक-त्र्यंबकेश्वर कुंभमेळा प्राधिकरणाने एक मोठे पाऊल उचलले आहे. रस्त्यांच्या कामात कोणत्याही प्रकारची तडजोड होऊ नये आणि प्रत्येक टप्प्यावर वैज्ञानिक पद्धतीने तपासणी व्हावी, यासाठी प्राधिकरणाने देशातील नामांकित 'आयआयटी बॉम्बे' (IIT Bombay) च्या सहकार्याने विविध सरकारी यंत्रणांतील अभियंत्यांसाठी एका विशेष ऑनलाइन तांत्रिक प्रशिक्षण शिबिराचे आयोजन केले होते. या महत्त्वपूर्ण प्रशिक्षण सत्राला कुंभमेळा आयुक्त शेखर सिंह तसेच कुंभमेळा प्राधिकरण उपआयुक्त (नियोजन) योगेंद्र चौधरी प्रामुख्याने उपस्थित होते.
आयआयटीच्या प्राध्यापकांचे 'डेंस बिट्युमिनस'वर मार्गदर्शन
या ऑनलाइन प्रशिक्षणात आयआयटी बॉम्बेचे प्रसिद्ध प्राध्यापक डॉ. धर्मवीर सिंह यांनी उपस्थित अभियंत्यांना सखोल मार्गदर्शन केले. डांबरी रस्त्यांचे काम करताना 'डेंस बिट्युमिनस मॅकॅडम' (DBM) आणि 'बिट्युमिनस काँक्रीट' (BC) या रस्त्यांच्या थरांची घनता (Density) तपासण्याच्या वैज्ञानिक व आधुनिक पद्धती त्यांनी समजावून सांगितल्या.
रस्त्यांची मजबुती, टिकाऊपणा आणि ते दीर्घकाळ टिकण्यासाठी 'घनता तपासणी' हा किती महत्त्वाचा अभियांत्रिकी निकष आहे, यावर त्यांनी प्रकाश टाकला. तसेच आधुनिक गुणवत्ता नियंत्रण प्रणाली आणि चाचणीच्या अचूक प्रक्रियेची माहिती दिली.
विविध यंत्रणांचे अभियंते प्रशिक्षणात सहभागी
कुंभमेळ्याच्या कामात समन्वय राहावा यासाठी या प्रशिक्षणात नाशिकमधील सर्वच प्रमुख विकास यंत्रणांच्या अधिकाऱ्यांना सामील करून घेण्यात आले होते. यामध्ये प्रामुख्याने:
सार्वजनिक बांधकाम विभाग (PWD)
महाराष्ट्र राज्य पायाभूत सुविधा विकास महामंडळ (MSIDC)
नाशिक महानगरपालिका (NMC)
भारतीय राष्ट्रीय महामार्ग प्राधिकरण (NHAI)
त्र्यंबकेश्वर आणि शिर्डी नगर परिषद
गुणवत्ता नियंत्रणात कोणतीही तडजोड नको: आयुक्त शेखर सिंह
या वेळी मार्गदर्शन करताना कुंभमेळा आयुक्त शेखर सिंह यांनी सर्व यंत्रणांना कडक निर्देश दिले. "सिंहस्थ कुंभमेळ्यासाठी उभारण्यात येणाऱ्या सर्वच पायाभूत सुविधा प्रकल्पांमध्ये 'गुणवत्ता नियंत्रण' (Quality Control) हाच आमचा सर्वोच्च प्राधान्याचा विषय असेल. प्रत्येक काम ठरवून दिलेल्या अभियांत्रिकी मानकांनुसारच झाले पाहिजे. वैज्ञानिक चाचण्यांमध्ये कोणतीही तडजोड किंवा हलगर्जीपणा खपवून घेतला जाणार नाही," असा इशारा त्यांनी दिला.
