जालना, (प्रतिनिधी) ९ जुलै - महाराष्ट्रातील हिंगोली आणि परभणी जिल्ह्यात गेल्या काही दिवसांपासून सुरू असलेले भूकंपाचे सत्र थांबण्याचे नाव घेत नाहीये. काल मध्यरात्री पुन्हा एकदा या भागाला भूकंपाच्या लागोपाठ ३ ते ४ तीव्र धक्क्यांनी हादरवून सोडले. यातील पहिला मुख्य धक्का पहाटे १.३७ वाजता बसला असून त्याची तीव्रता तब्बल ४.६ रिश्टर स्केल इतकी मोठी होती. या धक्क्यांमुळे हिंगोलीसह शेजारील परभणी आणि नांदेड जिल्ह्यांतही भीतीचे प्रचंड वातावरण निर्माण झाले आहे.
पांग्रा शिंदे आणि काकडधाबा केंद्रबिंदू
नॅशनल सेंटर फॉर सिस्मॉलॉजी (NCS) च्या माहितीनुसार, मध्यरात्रीनंतर एकापाठोपाठ एक असे धक्के नोंदवले गेले.
पहिला धक्का (पहाटे १.३७): ४.६ रिश्टर स्केल तीव्रता. केंद्रबिंदू वसमत तालुक्यातील पांग्रा शिंदे गावाच्या दक्षिणेकडे जमिनीखाली १० किमी खोलीवर होता. या धक्क्यापूर्वी भूगर्भातून मोठा गूढ आवाज आला.
दुसरा धक्का (पहाटे २.१५): ३.६ रिश्टर स्केल तीव्रता. केंद्रबिंदू काकडधाबा गावात १० किमी खोलीवर होता.
तिसरा धक्का (पहाटे २.१७): ३.९ रिश्टर स्केल तीव्रता. याचा केंद्रबिंदूही काकडधाबा गावातच होता.
चौथा धक्का (पहाटे ३.२३): पहाटेच्या सुमारास पुन्हा एकदा भूकंपाचा सौम्य धक्का जाणवला.
मंदिरांवरील भोंग्यांवरून दिल्या सूचना, रात्र जागून काढली
गाढ झोपेत असताना अचानक आलेल्या या संकटामुळे गावागावांमध्ये एकच खळबळ उडाली. अनेक गावांमधील मंदिरांवरील लाऊडस्पीकरवरून गावकऱ्यांना तातडीने जागे होण्याच्या आणि मोकळ्या जागेत येण्याच्या सूचना देण्यात आल्या. नागरिक लहान मुले आणि वृद्धांना घेऊन रात्रभर घराबाहेर, रस्त्यांवर आणि मैदानांत बसून होते. या तीव्र धक्क्यांमुळे काही जुन्या आणि मातीच्या घरांच्या भिंतींना तडे गेले आहेत. मात्र, सुदैवाने कोणतीही जीवितहानी झाली नसल्याची माहिती प्रशासनाने दिली आहे.
११ एप्रिल आणि २ जुलैच्या आठवणी ताज्या
या भागात यापूर्वी ११ एप्रिल २०२६ रोजी ४.७ रिश्टर स्केलचा मोठा भूकंप झाला होता, कालच्या धक्क्याने त्या भीतीदायक आठवणी पुन्हा ताज्या केल्या. विशेष म्हणजे, याच महिन्याच्या सुरुवातीला २ जुलै २०२६ रोजी अवघ्या १० तासांच्या अंतरात हिंगोलीत दोन भूकंप झाले होते. पहिला मध्यरात्री १.२० वाजता औंढा नागनाथ येथे आणि दुसरा सकाळी १०.१४ वाजता लोहरा गावात आला होता. पावसाळा सुरू होताच जमिनीखाली होणाऱ्या अंतर्गत हालचाली आणि पाण्याच्या दाबामुळे हे भूकंपाचे सत्र वारंवार घडत असल्याचे तज्ज्ञांचे म्हणणे आहे.
