मुंबई, (प्रतिनिधी) ८ जुलै - अंमली पदार्थांच्या (ड्रग्ज) आंतरराष्ट्रीय तस्करीविरुद्ध मुंबईत एक मोठी कारवाई करण्यात आली आहे. महसूल गुप्तचर संचालनालयाच्या (DRI) मुंबई विभागीय पथकाने छत्रपती शिवाजी महाराज आंतरराष्ट्रीय विमानतळावर (CSMIA) एका परदेशी महिला प्रवाशाला अटक केली आहे. या महिलेकडून तब्बल २.१२८ किलोग्रॅम (२१२८ ग्रॅम) वजनाचे उच्च दर्जाचे कोकेन जप्त करण्यात आले असून, आंतरराष्ट्रीय बाजारात याची किंमत अंदाजे १० कोटी ६५ लाख रुपये आहे.
अशी झाली कारवाई
'डीआरआय'च्या अधिकाऱ्यांना एका परदेशी महिलेकडून ड्रग्जची तस्करी होणार असल्याची खात्रीशीर गुप्त माहिती मिळाली होती. त्यानुसार, रविवारी (५ जुलै) फ्रीटाउनहून नैरोबीमार्गे मुंबईत उतरलेल्या एका संशयित महिला प्रवाशाला अधिकाऱ्यांनी विमानतळावर हटकले.
ट्रॉली बॅगच्या हँडलमध्ये रचला होता सापळा
सुरुवातीला या महिलेच्या सामानाची वरवर तपासणी केली असता काहीच संशयास्पद आढळले नाही. मात्र, अधिकाऱ्यांनी तिच्या 'ट्रॉली बॅग्स'ची एक्स-रे मशीनद्वारे कसून तपासणी केली. तेव्हा बॅग ओढण्यासाठी असलेल्या धातूच्या हँडल्समध्ये (Metal Handles) काहीतरी लपवल्याचे समोर आले. अधिकाऱ्यांनी तातडीने ते हँडल्स तोडून पाहिले असता, त्यात दंडगोलाकार आकाराची एकूण १७ पाकिटे दडवून ठेवलेली आढळली.
चाचणीत 'कोकेन' असल्याचे निष्पन्न
या १७ पाकिटांमध्ये पांढऱ्या रंगाच्या पावडरसारखा पदार्थ भरलेला होता. 'डीआरआय'च्या विशेष चाचणी उपकरणाद्वारे (ड्रग डिटेक्शन किट) या पावडरीची जागेवरच परीक्षा करण्यात आली असता, तो अमली पदार्थ 'कोकेन' असल्याचे स्पष्ट झाले. पोलिसांनी १०.६५ कोटींचे हे कोकेन आणि संबंधित साहित्य जप्त केले आहे.
'एनडीपीएस' कायद्यांतर्गत गुन्हा दाखल
जप्त करण्यात आलेला हा सर्व प्रतिबंधित माल 'अंमलीपदार्थ आणि मनोव्यापारिक औषधे (NDPS) कायदा, १९८५' च्या कडक तरतुदींनुसार जप्त करण्यात आला असून संबंधित परदेशी महिला प्रवाशाला अटक करण्यात आली आहे.
या आंतरराष्ट्रीय ड्रग्ज तस्करीमागे आणखी कोणती मोठी टोळी किंवा देशांतर्गत जाळे कार्यरत आहे का, याचा शोध घेण्यासाठी 'डीआरआय'चे पथक पुढील तपास करत आहे. 'नशामुक्त भारत' घडवण्याच्या संकल्पासाठी कटिबद्ध राहून ही धडक कारवाई करण्यात आल्याचे अधिकाऱ्यांनी सांगितले.
