त्र्यंबकेश्वर, (प्रतिनिधी) २९ जून - आगामी कुंभमेळ्याच्या पार्श्वभूमीवर त्र्यंबकेश्वर येथे शासनाच्या पाटबंधारे विभागामार्फत बांधण्यात येणाऱ्या कुंभमेळा घाटांची आणि विविध विकासकामांची पाहणी अखिल भारतीय आखाडा परिषदेच्या प्रमुख पदाधिकाऱ्यांनी व त्र्यंबकेश्वरमधील साधू-महंतांनी केली. कुंभमेळ्याच्या नियोजनासाठी साधू-महंतांनी प्रत्यक्ष मैदानावर उतरून घाटांची पाहणी करण्याची ही पहिलीच वेळ आहे.
२ किलोमीटर लांबीचा भव्य घाट
त्र्यंबकेश्वर गावातील मुख्य कुशावर्त तीर्थावर पर्वणीच्या काळात भाविकांची होणारी अलोट गर्दी लक्षात घेऊन, प्रशासनातर्फे कोट्यवधी रुपये खर्चून नव्या घाटांची उभारणी केली जात आहे. येथील प्रसिद्ध श्री गजानन महाराज मंदिराच्या समोरील भागापासून ते थेट प्रयाग तीर्थ या दोन किलोमीटरच्या परिसरामध्ये हा भव्य घाट तयार होत आहे. या निर्माणाधीन स्नान घाटांची आणि सोबतच 'निवाण दिंडी' रस्ता प्रकल्पाच्या कामाची महंतांनी बारकाईने पाहणी केली.
प्रमुख महंतांची उपस्थिती
या महत्त्वपूर्ण पाहणी दौऱ्यात अखिल भारतीय आखाडा परिषदेचे अध्यक्ष श्री महंत डॉ. रवींद्र पुरीजी महाराज, आखाडा परिषदेचे महामंत्री हरीगिरीजी महाराज, कोषाध्यक्ष महंत शंकरानंद सरस्वती, निरंजनी आखाड्याचे धनंजय गिरी महाराज यांच्यासह नील पर्वतावरील श्री पंच दशनाम जुना आखाड्याचे वरिष्ठ महंत व इतर १० आखाड्यांचे प्रमुख पदाधिकारी, संत-महात्मे मोठ्या संख्येने उपस्थित होते.
घाटांसोबतच इतर सुविधाही द्या: महामंत्री हरीगिरीजी महाराज
पाहणी दौऱ्यानंतर प्रसारमाध्यमांशी बोलताना आखाडा परिषदेचे महामंत्री हरीगिरीजी महाराज म्हणाले की, "शासनाने केवळ घाट बांधण्यावर मर्यादित न राहता, या ठिकाणी येणाऱ्या देशभरातील कोट्यवधी भाविकांसाठी इतर पायाभूत आणि अत्यावश्यक सुविधाही तातडीने उपलब्ध करून दिल्या पाहिजेत. प्रत्यक्ष पर्वकाळात आणि कुंभमेळा यशस्वी करण्यासाठी साधू-महंत नेहमीच प्रशासनाला पूर्ण सहकार्य करतील."
धरण क्षेत्राचीही केली पाहणी
घाटांच्या पाहणीनंतर सर्व साधू-महंतांनी त्र्यंबकेश्वर परिसराला पाणीपुरवठा करणाऱ्या बेझे धरण पाणी पुरवठा योजना आणि किकवी धरणाला (किकवी डॅम) भेट देऊन तिथल्या पाणी साठवणुकीचे व नियोजनाचे निरीक्षण केले. कुंभमेळ्यादरम्यान भाविक आणि साधूंची गैरसोय होऊ नये, यासाठी हा दौरा अत्यंत महत्त्वाचा मानला जात आहे.
