पुणे, (प्रतिनिधी) २९ जून - लोणावळ्याजवळील ऐतिहासिक लोहागड किल्ल्यावरून होणारा नवरा केतन अग्रवाल याला दरीत ढकलून हत्या केल्याच्या हाय-प्रोफाइल प्रकरणात दररोज थक्क करणारे खुलासे समोर येत आहेत. मुख्य आरोपी सिया गोयल हिने केवळ केतनच्या 'टक्कल' असण्यामुळे त्याची हत्या केली नसून, यामागे कोट्यवधी रुपयांचे आर्थिक कारस्थान आणि एक पूर्वनियोजित कट होता, अशी अत्यंत महत्त्वाची माहिती पोलिसांच्या हाती लागली आहे. लग्नापासून वाचण्यासाठी आणि प्रियकराला सेट करण्यासाठी सियाने चक्क '३ वर्षांचा' मास्टरप्लॅन आखला होता. सध्या सिया गोयल आणि तिचा प्रियकर चेतन चौधरी हे दोन्ही आरोपी पोलीस कोठडीत असून, पोलीस त्यांची कसून चौकशी करत आहेत.
लग्नापासून वाचण्यासाठी '३ वर्षांचा' प्लॅन काय होता?
पोलीस सूत्रांनी दिलेल्या माहितीनुसार, चौकशीदरम्यान सियाने गुन्ह्याची कबुली देताना अत्यंत धक्कादायक माहिती दिली. सियाला केतन अग्रवालसोबत लग्न करायचेच नव्हते. मात्र, जर तिने स्वतःहून लग्न मोडले असते, तर समाजात कुटुंबाची बदनामी झाली असती. या बदनामीच्या भीतीने तिने थेट केतनचा काटा काढण्याचा निर्णय घेतला. केतनचा मृत्यू झाल्यास, कुटुंबाला मोठा धक्का बसेल आणि या दुःखातून सावरण्यासाठी तसेच दुसऱ्या लग्नाचा विचार करण्यासाठी आपल्याला किमान ३ वर्षांचा वेळ सहज मिळेल, असा सियाचा समज होता.
खरेदीच्या बहाण्याने १ कोटींची माया उकळली?
'एनडीटीव्ही'ने दिलेल्या वृत्तानुसार, सियाला ३ वर्षांनंतर प्रियकर चेतन चौधरीसोबतच संसार थाटायचा होता. दरम्यान, चेतनचा बिझनेस आणि करिअर सेट करण्यासाठी सियाने केतनला आर्थिक गंडा घातला. लग्नाच्या खरेदीच्या बहाण्याने तिने केतन अग्रवालकडून तब्बल १ कोटी रुपये उकळल्याची माहिती समोर आली आहे. हे सर्व पैसे तिने थेट चेतनकडे सुपूर्द केले होते. तिने खरोखरच केतनकडून एवढी मोठी रक्कम घेतली होती का आणि ती कोणत्या खात्यावर वळवण्यात आली, याचा बँकिंग आणि तांत्रिक तपास सध्या पोलीस करत आहेत.
...आणि असा होता पुढील प्लॅन
आरोपी चेतन चौधरीने सियाला विश्वास दिला होता की, केतनकडून मिळालेल्या १ कोटी रुपयांच्या बळावर स्वतःचा बिझनेस उभा करण्यासाठी आणि पायावर उभे राहण्यासाठी त्याला ३ वर्षे लागतील. केतनच्या मृत्यूनंतर काही काळ गेल्यानंतर, चेतन स्वतःहून सियाच्या कुटुंबाला भेटणार होता आणि तिच्याशी लग्नाची मागणी घालणार होता. ३ वर्षांनंतर होणाऱ्या या मागणीमुळे आणि चेतनच्या सेटल झालेल्या बिझनेसमुळे कोणालाही त्यांच्यावर संशय आला नसता, असा हा संपूर्ण कट होता.
आर्थिक व्यवहारांची बारकाईने चौकशी सुरू
या हाय-प्रोफाइल हत्याकांडात आता आर्थिक गुन्हेगारीचा अँगल समोर आल्यामुळे महाराष्ट्र पोलीस या प्रकरणातील सर्व बँक खाती, कॉल रेकॉर्ड्स आणि संशयित आर्थिक व्यवहारांची बारकाईने चौकशी करत आहेत. या तपासातून आणखी काही मोठे चेहरे किंवा धक्कादायक माहिती समोर येण्याची शक्यता पोलिसांनी वर्तवली आहे.
