पालघर, (प्रतिनिधी) २९ जून - राज्याच्या पायाभूत सुविधा आणि आर्थिक विकासाला नवी गती देणाऱ्या अनेक महत्त्वाकांक्षी प्रकल्पांचा प्रत्यक्ष आढावा घेण्यासाठी मुख्यमंत्री देवेंद्र फडणवीस यांनी आज पालघर जिल्ह्याचा झंझावाती दौरा केला. या दौऱ्यात त्यांनी वाढवण बंदर, मुंबई-अहमदाबाद बुलेट ट्रेन प्रकल्प, प्रस्तावित वाढवण आंतरराष्ट्रीय विमानतळ, नारिंगी खाडी पूल आणि उत्तन–विरार सागरी सेतू या अत्यंत महत्त्वाच्या विकासकामांची प्रत्यक्ष जागेवर जाऊन पाहणी केली. तसेच, हे सर्व प्रकल्प नियोजित वेळेत पूर्ण करण्यासाठी संबंधित विभागांच्या वरिष्ठ अधिकाऱ्यांना आवश्यक त्या मार्गदर्शक सूचना दिल्या.
७६ हजार कोटींचे 'वाढवण बंदर' देशपातळीवर ठरणार मैलाचा दगड
चिंचणी येथील समुद्रकिनाऱ्यावर प्रस्तावित असलेल्या वाढवण बंदर प्रकल्पाची मुख्यमंत्र्यांनी सविस्तर पाहणी केली. याप्रसंगी त्यांनी अंतर्गत रस्त्यांचे जाळे, वन विभागाची मंजुरी, वीज-पाणी पुरवठा, रेल्वे कनेक्टिव्हिटी, भूसंपादन, कौशल्य विकास आणि स्थानिक मच्छिमारांच्या नुकसानभरपाई संदर्भातील कामांचा आढावा घेतला.
प्रकल्प खर्च व कालावधी: सुमारे ७६ हजार २२० कोटी रुपये खर्चाचा हा ग्रीनफिल्ड बंदर प्रकल्प १,४४८ हेक्टर क्षेत्रावर उभारला जाणार असून पुढील ६० महिन्यांत तो पूर्ण करण्याचे नियोजन आहे.
वैशिष्ट्य: अत्याधुनिक ‘नेक्स्ट जनरेशन’ जहाजे हाताळण्याची क्षमता असलेले हे बंदर भारतातील सर्वात मोठ्या खोल समुद्री बंदरांपैकी एक ठरणार आहे.
बुलेट ट्रेन आणि आंतरराष्ट्रीय विमानतळाची पाहणी
मुख्यमंत्री फडणवीस यांनी मुंबई-अहमदाबाद बुलेट ट्रेन प्रकल्पातील बोईसर स्थानकाच्या निर्माणाधीन कामांची आणि प्रकल्प आराखड्याची बारकाईने पाहणी केली. कामाचा वेग व दर्जा टिकवून ठेवण्याबाबत त्यांनी अधिकार्यांशी चर्चा केली.
त्यानंतर, प्रस्तावित वाढवण आंतरराष्ट्रीय विमानतळाच्या जागेचीही पाहणी करण्यात आली. हा विमानतळ डेडिकेटेड फ्रेट कॉरिडॉर (DFC), बुलेट ट्रेन, उत्तन–विरार सी-लिंक आणि मुंबई–वडोदरा द्रुतगती मार्गाच्या सान्निध्यात असल्याने मालवाहतुकीला मोठी चालना देईल. तसेच मुंबई विमानतळावरील प्रवाशांचा वाढता ताण कमी करण्यासाठी हा प्रकल्प अत्यंत महत्त्वपूर्ण ठरेल.
नारिंगी खाडी पुलामुळे प्रवासाचे अंतर ४० किमीने घटणार
एमएमआरडीए (MMRDA) मार्फत उभारण्यात येणाऱ्या नारिंगी खाडी पुलाच्या कामाचा मुख्यमंत्र्यांनी आढावा घेतला. सुमारे ८५० कोटी रुपये खर्चाचा हा ४.१० किलोमीटर लांबीचा पूल वसई-विरारला थेट सफाळे, पालघर आणि बोईसर या शहरांशी जोडणार आहे. यामुळे प्रवासाचे अंतर सुमारे ४० किलोमीटरने आणि वेळ ४५ मिनिटांनी कमी होणार आहे.
५८ हजार कोटींचा 'उत्तन–विरार सागरी सेतू'
अंदाजे ५८ हजार ७५४ कोटी रुपये खर्चाच्या या सहापदरी उत्तन-विरार सागरी सेतू प्रकल्पाबाबतही सविस्तर चर्चा झाली. या सेतूची थेट जोडणी मुंबई–अहमदाबाद राष्ट्रीय महामार्गाशी होणार असल्याने दक्षिण मुंबई ते अहमदाबाद दरम्यानचा प्रवास अधिक जलद, सुरक्षित आणि सुलभ होणार आहे.
वरिष्ठ मान्यवरांची उपस्थिती:
या महत्त्वपूर्ण दौऱ्याप्रसंगी वनमंत्री तथा पालघरचे पालकमंत्री गणेश नाईक, मत्स्यव्यवसाय व बंदरे मंत्री नितेश राणे, खासदार डॉ. हेमंत सवरा, आमदार राजेंद्र गावित, कोकण विभागाचे पोलीस महानिरीक्षक चंद्रकिशोर मीना, एमएडीसीचे उपाध्यक्ष दीपक कपूर, जेएनपीएचे अध्यक्ष गौरव दयाल, मीरा-भाईंदर वसई–विरारचे पोलीस आयुक्त निकेत कौशिक, जिल्हाधिकारी डॉ. वंदना जाखड (डॉ. इंदु राणी जाखड) यांसह विविध विभागांचे वरिष्ठ अधिकारी उपस्थित होते.
राज्यातील बंदर, वाहतूक, उद्योग, निर्यात आणि मोठ्या प्रमाणावर रोजगारवाढीच्या दृष्टीने पालघर जिल्ह्यातील हे सर्व प्रकल्प भविष्यात ‘गेमचेंजर’ ठरणार असल्याचा विश्वास मुख्यमंत्र्यांनी यावेळी व्यक्त केला.
