मुंबई, (प्रतिनिधी) ८ जून - राष्ट्रवादी काँग्रेस पक्षाच्या (अजित पवार गट) राष्ट्रीय अध्यक्षा सुनेत्रा पवार यांनी उपमुख्यमंत्रीपदाची जबाबदारी स्वीकारल्यानंतर आपल्या राज्यसभा खासदारकीचा राजीनामा दिला होता. या रिक्त झालेल्या जागेवर ज्येष्ठ नेते छगन भुजबळ स्वतः उत्सुक होते. मात्र, अचानक त्यांचे नाव डावलून प्रफुल पटेल यांचे निकटवर्तीय राजेंद्र जैन यांना उमेदवारी जाहीर करण्यात आल्याने राजकीय वर्तुळात मोठी खळबळ उडाली आहे. हा छगन भुजबळ यांच्यासाठी मोठा धक्का मानला जात असून, या घडामोडींवर आता खुद्द भुजबळ यांनी आपली अत्यंत सूचक आणि स्पष्ट प्रतिक्रिया दिली आहे.
"इतरांच्या मुलाबाळांसारखा मलाही न्याय मिळावा" - भुजबळांची मनातली सल
राज्यसभेची उमेदवारी न मिळाल्यामुळे पक्षात कमालीचे नाराज असल्याच्या चर्चांवर बोलताना छगन भुजबळ यांनी आपल्या मनातली सल जाहीरपणे बोलून दाखवली. ते म्हणाले:
"मी काय नाराज नाही. मी फक्त एवढंच सांगितलं होतं की, जसा इतरांना न्याय मिळाला आहे, तसा मलाही मिळावा. इतरांची मुलंबाळं जशी राज्यसभेवर, लोकसभेवर आणि मंत्री आहेत, त्याप्रमाणे मी देखील हा पक्ष स्थापन करण्यापासून पुढाकार घेतलेला आहे. त्यामुळे मलासुद्धा हाच न्याय मिळाला पाहिजे, एवढीच माझी मागणी होती."
या सर्व घडामोडींमध्ये तुमच्यावर अन्याय झाला आहे का? असे विचारले असता भुजबळ मिश्कीलपणे म्हणाले, "तो अन्याय म्हणजे... हे आता चालायचंच! आज नाही तर उद्या, उद्या नाही तर परवा. पण लक्षात ठेवा, मी कबड्डीचा खेळाडू आहे, बुद्धिबळाचा नाही!" त्यांच्या या विधानामुळे आगामी काळात ते कोणती राजकीय खेळी करणार, याकडे सर्वांचे लक्ष लागले आहे.
समीर भुजबळांचे मंत्रिपद आणि भाजपचा 'रेड सिग्नल'?
राजकीय वर्तुळातील सूत्रांच्या दाव्यानुसार, छगन भुजबळ यांनी राज्यसभेवर जाण्याकरिता काही अटी ठेवल्या होत्या. त्यांचे पुतणे समीर भुजबळ यांना राज्य मंत्रिमंडळात स्थान द्यावे, अशी ही मुख्य अट होती. मात्र, या अटीला भाजपकडून 'रेड सिग्नल' देण्यात आल्याचे बोलले जात आहे.
या चर्चा फेटाळून लावताना छगन भुजबळ म्हणाले, "भाजपकडे प्रपोजल मांडल्यानंतर शेवटचा एकच दिवस शिल्लक होता. शेवटच्या दिवशी एकच उत्तर आलं की, ज्यावेळी मंत्रिमंडळाचा विस्तार होईल, त्यावेळी यावर विचार करू. त्यामुळे भाजपने उमेदवारी देण्यास थेट नकार दिला, या गोष्टींमध्ये अजिबात तथ्य नाही."
'देवगिरी' बंगल्यावरील बैठकीनंतर थेट एक्झिट!
दरम्यान, उमेदवाराच्या नावाची घोषणा होण्यापूर्वी उपमुख्यमंत्री अजित पवार यांचे शासकीय निवासस्थान असलेल्या 'देवगिरी' बंगल्यावर राष्ट्रवादीच्या नेत्यांची महत्त्वाची बैठक पार पडली. या बैठकीनंतर छगन भुजबळ आणि समीर भुजबळ हे दोघेही प्रसारमाध्यमांशी कोणतीही प्रतिक्रिया न देता थेट निघून गेले. यामुळे त्यांच्या नाराजीच्या चर्चांना अधिक उधाण आले आहे.
दुसरीकडे, पक्षाचे प्रदेशाध्यक्ष सुनील तटकरे यांनी छगन भुजबळ पक्षात अजिबात नाराज नसल्याचा दावा केला असून, सर्व निर्णय एकमताने झाल्याचे स्पष्ट केले आहे. मात्र, भुजबळांच्या 'कबड्डी'च्या विधानामुळे महायुतीतील अंतर्गत धुसफूस आता चव्हाट्यावर आली आहे.
