मुंबई, (प्रतिनिधी) ८ जून - महायुतीमध्ये नाशिक किंवा इतर मतदारसंघातून ज्येष्ठ नेते छगन भुजबळ यांना उमेदवारी न मिळाल्यावरून राजकीय वर्तुळात उलटसुलट चर्चा सुरू असतानाच, आता राष्ट्रवादी काँग्रेस (शरदचंद्र पवार) पक्षाच्या खासदार सुप्रिया सुळे यांनी यावर अत्यंत महत्त्वपूर्ण आणि भावनिक प्रतिक्रिया दिली आहे. "भुजबळ साहेबांना उमेदवारी का मिळाली नाही हे मला माहित नाही. मी दुसऱ्याच्या घरात कशाला बघू? मात्र, आदरणीय भुजबळ साहेबांबद्दल माझ्या मनात नेहमीच आदर आणि प्रेम राहिलं आहे," असे सांगत सुप्रिया सुळे यांनी महायुतीमधील अंतर्गत वादावर थेट बोलणे टाळले असले, तरी भुजबळांच्या कर्तृत्वाचा गौरव केला आहे.
त्यांनी शून्यातून विश्व उभं केलं!
छगन भुजबळ यांच्या राजकीय प्रवासाचा उल्लेख करताना खासदार सुळे म्हणाल्या की, भुजबळ साहेबांनी शून्यातून खूप मोठं राजकीय आणि सामाजिक विश्व उभं केलं आहे. आदरणीय शरद पवार साहेबांसोबत त्यांनी अनेक वर्षे सुख-दुःखाचे दिवस काढले आहेत, याची मला पूर्ण जाणीव आहे. त्यामुळे मी त्यांच्या ऋणात आयुष्यभर राहीन, अशी कृतज्ञताही त्यांनी यावेळी व्यक्त केली.
दिल्लीला जाण्याची इच्छा असण्यात गैर काय?
छगन भुजबळ यांच्या दिल्लीत जाण्याच्या आणि खासदारकी लढवण्याच्या इच्छेचे सुप्रिया सुळे यांनी उघड समर्थन केले. "आयुष्याच्या ज्या टप्प्यावर आज भुजबळ साहेब उभे आहेत, त्यांनी आपल्या राजकीय जीवनात जो त्याग केलाय, जे अफाट कष्ट केलेत, त्यानंतर जर त्यांना दिल्लीला (संसदेत) यायचं असेल, तर त्यामध्ये गैर काय आहे?" असा रोखठोक सवाल उपस्थित करत सुळे यांनी भुजबळांच्या दिल्लीवारीच्या इच्छेला न्याय्य ठरवले आहे.
सुप्रिया सुळे यांच्या या विधानामुळे छगन भुजबळ यांच्या उमेदवारीवरून महायुतीत नक्की काय शिजले, या चर्चांना पुन्हा एकदा उधाण आले असून, महाविकास आघाडीच्या नेत्यांनी भुजबळांबद्दल दाखवलेली ही सहानुभूती आगामी काळातील नव्या राजकीय समीकरणांची नांदी तर नाही ना, अशी चर्चा आता रंगू लागली आहे.
