मुंबई, (प्रतिनिधी) ५ जून - श्रम आणि रोजगार मंत्रालयाच्या अंतर्गत असलेल्या कर्मचारी राज्य विमा महामंडळाने (ईएसआयसी) सेवांचा दर्जा सुधारण्यासाठी आणि रुग्ण-केंद्रित आरोग्यसेवा सुनिश्चित करण्यासाठी एक मोठे पाऊल उचलले आहे. ईएसआयसीने देशभरातील आपल्या सर्व रुग्णालये आणि दवाखान्यांमध्ये केंद्रीकृत ऑनलाइन रुग्ण अभिप्राय प्रणाली यशस्वीरित्या लागू केली आहे. या डिजिटल सुविधेमुळे आता विमाधारक व्यक्ती आणि लाभार्थ्यांना त्यांचा आरोग्यसेवेचा अनुभव थेट आणि सोयीस्करपणे सरकारपर्यंत पोहोचवता येणार आहे.
प्रमुख सेवांचे होणार मूल्यमापन
या ऑनलाइन मंचाच्या माध्यमातून रुग्णालयांमधील स्वच्छता, सुविधा, वैद्यकीय कर्मचाऱ्यांचे वर्तन आणि अत्यावश्यक औषधांची उपलब्धता यांसारख्या प्रमुख सेवांवर नागरिकांचा अभिप्राय पद्धतशीरपणे नोंदवून घेतला जाईल. यामुळे सेवा वितरणात सातत्याने सुधारणा करणे प्रशासनाला शक्य होणार आहे.
अभिप्राय नोंदवण्यासाठी बहुभाषिक आणि सुलभ पर्याय
रुग्णांना आपला अभिप्राय सहज नोंदवता यावा यासाठी यंत्रणेने विविध पर्याय उपलब्ध करून दिले आहेत:
स्वयंचलित एसएमएस: ईएसआयसीच्या धन्वंतरी (HIS) प्रणालीद्वारे उपचार घेतल्यानंतर विमाधारकांना थेट त्यांच्या मोबाईलवर एसएमएस लिंक पाठवली जाईल.
क्यूआर कोड (QR Code): रुग्णालयांच्या आवारात आणि ओपीडी (OPD) मध्ये बहुभाषिक भित्तीपत्रकांवर क्यूआर कोड लावले आहेत. रुग्ण मोबाईलने हा कोड स्कॅन करून, आपला आयपी (IP) नंबर टाकून काही सेकंदांत अभिप्राय देऊ शकतात.
वेब पोर्टल: लाभार्थी ईएसआयसीच्या अधिकृत संकेतस्थळाला भेट देऊनही आपला प्रतिसाद नोंदवू शकतात.
ओटीपीद्वारे होणार पडताळणी; सुरक्षिततेला प्राधान्य
या प्रणालीची विश्वासार्हता टिकवून ठेवण्यासाठी आणि खोट्या तक्रारी किंवा दुबार सादरीकरण टाळण्यासाठी सुरक्षित ओटीपी (OTP) आधारित पडताळणी प्रक्रिया लागू करण्यात आली आहे. तसेच, भारतातील विविध राज्यांमधील कामगारांचा विचार करून ही प्रणाली बहुभाषिक ठेवण्यात आली आहे.
तीन स्तरांवर देखरेख आणि जलद निवारण
रुग्णांनी नोंदवलेल्या अभिप्रायावर तातडीने प्रशासकीय कारवाई व्हावी, यासाठी एक मजबूत डिजिटल डॅशबोर्ड तयार करण्यात आला आहे. याद्वारे तीन वेगवेगळ्या स्तरांवर कामगिरीचे निरीक्षण केले जाईल:
१. मुख्यालय स्तर
२. प्रादेशिक कार्यालये स्तर
३. स्थानिक ईएसआय आरोग्य सुविधा स्तर
या प्रणालीमुळे आता आरोग्य सुविधांचे कामगिरीवर आधारित मानांकन (रँकिंग) केले जाईल. परिणामी, रुग्णालयांमध्ये निकोप स्पर्धा निर्माण होऊन संस्थात्मक उत्तरदायित्व अधिक मजबूत होईल, असा विश्वास मंत्रालयाकडून व्यक्त करण्यात आला आहे.
