नाशिक, (प्रतिनिधी) ४ जून २०२६ -
नाशिक स्थानिक स्वराज्य संस्था विधानपरिषद निवडणुकीत गुरुवारी अर्ज माघारीच्या शेवटच्या दिवशी कमालीचा नाट्यमय आणि 'हायव्होल्टेज ड्रामा' पाहायला मिळाला. महायुतीतील बंडखोरी शमवण्यासाठी भाजप आणि शिवसेनेच्या वरिष्ठ नेत्यांनी जंगजंग पछाडले असतानाच, एका कथित फोन कॉलमुळे नाशिकचे राजकारण प्रचंड तापले आहे. कुणाल दराडे यांनी फोनवरून अंगावर येत अर्वाच्च भाषेत शिवीगाळ करत धमकी दिल्यामुळे अपक्ष उमेदवार गोकुळ गिते यांनी ऐनवेळी अर्ज मागे घेण्यास स्पष्ट नकार दिला. यामुळे नाशिकमधील महायुतीचे अधिकृत उमेदवार नरेंद्र दराडे यांच्यासमोरील अडचणी कमालीच्या वाढल्या आहेत.
"आमचा बाप काढल्याने मी नाराज, आता माघार नाहीच!" — गोकुळ गिते
मिळालेल्या माहितीनुसार, अर्ज मागे घेण्याची प्रक्रिया सुरू असताना कुणाल दराडे यांनी गोकुळ गिते यांच्याशी फोनवरून संपर्क साधला. मात्र, या संभाषणादरम्यान दराडे यांनी गीतेंना थेट धमकी देत अर्वाच्च भाषा वापरली. यावर अत्यंत संतप्त प्रतिक्रिया देत गोकुळ गिते म्हणाले, "त्यांनी फोनवर आमचा बाप काढला, त्यामुळे मी प्रचंड नाराज आहे. अशा प्रकारे कुणी धमकी देत असेल, तर मी आता कोणत्याही परिस्थितीत माघार घेणार नाही." या भूमिकेवर ठाम राहत गोकुळ गिते यांनी निवडणूक लढवण्याचा निर्धार केला असून, त्यांना महाविकास आघाडी (मविआ) आणि इतर विरोधकांनी अंतर्गत पाठिंबा देण्याची तयारी दर्शवली आहे.
"देवेंद्र फडणवीस-गिरीश महाजनांना दिलेला शब्द पाळणार" — गणेश गिते
दुसरीकडे, गोकुळ गिते यांचे बंधू आणि नाशिक मनपाचे माजी स्थायी समिती सभापती गणेश गिते हे मात्र स्वतःचा अर्ज मागे घेण्यासाठी जिल्हाधिकारी कार्यालयात दाखल झाले होते. प्रसारमाध्यमांशी बोलताना ते म्हणाले, "आम्ही पक्षाशी आणि विचारसरणीशी एकनिष्ठ आहोत. आम्ही जो शब्द उपमुख्यमंत्री देवेंद्र फडणवीस आणि संकटमोचक मंत्री गिरीश महाजन यांना दिला होता, तो शब्द आम्ही शंभर टक्के पाळणार आहोत." गणेश गिते यांनी आपला अर्ज मागे घेतला असून, भाऊ गोकुळ गिते यांचीही मनधरणी करून त्यांना कार्यालयात आणू, असा विश्वास त्यांनी शेवटपर्यंत व्यक्त केला. अगदी मीडियासमोरही फोनवरून गोकुळ गीतेंचे मन वळवण्याचे प्रयत्न सहकाऱ्यांकडून सुरू होते.
शेवटच्या १५ मिनिटांत मुख्यमंत्री अन् प्रदेशाध्यक्षांचे थेट फोन!
नाशिकमधील हा राजकीय सस्पेन्स संपवण्यासाठी मुंबईतून थेट सुत्रे हलत होती. अर्ज मागे घेण्यासाठी अवघी १५ मिनिटे शिल्लक असताना चक्रे वेगाने फिरली:
मुख्यमंत्री एकनाथ शिंदे यांनी मंत्री गिरीश महाजन यांचे निकटवर्तीय निलेश बोरा यांना थेट फोन लावला आणि नाशिकमधील ग्राउंड रिपोर्ट आणि गोकुळ गीतेंच्या मनधरणीबाबत सविस्तर माहिती घेतली.
भाजप प्रदेशाध्यक्ष रवींद्र चव्हाण यांनीही ऐनवेळी थेट गणेश गिते यांना फोन करून चर्चा केली. चव्हाणांच्या फोननंतर भाजपच्या गोटात हालचालींना प्रचंड वेग आला होता.
नाशिकमध्ये आता 'दराडे विरुद्ध गिते' थेट थरार!
मंत्री गिरीश महाजन यांच्या मध्यस्थीमुळे गणेश गिते यांनी माघार घेतली असली, तरी त्यांचे बंधू गोकुळ गिते मैदानात ठाम राहिल्याने महायुतीची डोकेदुखी वाढली आहे. दराडे यांच्या कथित धमकीच्या वादामुळे आता ही लढत वैयक्तिक प्रतिष्ठेची बनली आहे. आता निवडणुकीच्या रिंगणात अधिकृत उमेदवार नरेंद्र दराडे यांच्यासमोर गोकुळ गिते यांनी अपक्ष शिंग फुंकल्याने मतदारांचा कौल कोणाच्या बाजूने जातो, याकडे संपूर्ण राज्याचे लक्ष लागले आहे.
