पंढरपूर (प्रतिनिधी) २५ मे - अधिक मासाच्या पवित्र पर्वावर चंद्रभागा स्नान आणि लाडक्या विठुरायाच्या दर्शनासाठी पंढरीत लाखो भाविकांची अथांग गर्दी उसळत आहे. या पार्श्वभूमीवर, सर्वसामान्य भाविकांना सुलभ, जलद आणि शांततेत दर्शन मिळावे यासाठी जिल्हाधिकारी कार्तिकेयन एस. यांच्या सूचनेनुसार मंदिर प्रशासनाने मोठा निर्णय घेतला आहे. अधिक मास संपेपर्यंत पंढरपुरातील 'व्हीआयपी' (VIP) दर्शन पूर्णपणे बंद करण्यात आले असून, दर्शन रांगेत घुसखोरी करणाऱ्यांविरुद्ध थेट गुन्हे दाखल करून कठोर कारवाई केली जाणार आहे, अशी माहिती मंदिर समितीचे कार्यकारी अधिकारी राजेंद्र शेळके यांनी दिली.
१५ जूनपर्यंत कडक नियम; 'कलम १६३' लागू
१७ मे ते १५ जून २०२६ या कालावधीत अधिक मासानिमित्त विठ्ठल-रुक्मिणीच्या दर्शनासाठी देशभरातून भाविक दाखल होत आहेत. व्हीआयपी दर्शनामुळे दर्शन रांगेतील सर्वसामान्य भाविकांना तासनतास ताटकळत राहावे लागत असल्याने हे दर्शन बंद करण्यात आले आहे.
तसेच, काही इसमांकडून दर्शन रांगेत नियमबाह्य पद्धतीने घुसखोरी करून गोंधळ निर्माण केला जात असल्याच्या तक्रारी आल्या होत्या. त्यामुळे कायदा व सुव्यवस्था राखण्यासाठी उपविभागीय दंडाधिकाऱ्यांच्या सूचनेनुसार भारतीय नागरिक सुरक्षा संहिता २०२३ च्या कलम १६३ (२) अन्वये दर्शन रांगेत घुसखोरी करणाऱ्यांवर प्रतिबंधात्मक आदेश लागू करण्यात आले आहेत. नियमांचे उल्लंघन करणाऱ्यांवर कडक कायदेशीर कारवाई केली जाईल.
भाविकांच्या सुविधेसाठी व्यापक नियोजन
लाखो भाविकांची गर्दी लक्षात घेता मंदिर समिती, पोलीस आणि महसूल प्रशासनाने चोख व्यवस्था केली आहे:
सावलीची सोय: दर्शन रांग आणि मंदिर परिसरात कडक उन्हाचा त्रास होऊ नये म्हणून शेडनेट उभारून सावली तयार करण्यात आली आहे.
वॉटरप्रूफ रांग: अचानक येणाऱ्या पावसापासून संरक्षणासाठी दर्शन रांग पूर्णपणे वॉटरप्रूफ करण्यात आली आहे, जेणेकरून भाविक सुरक्षितपणे रांगेत थांबू शकतील.
महत्त्वाची सूचना: दर्शनाची वेळ पाहूनच रांगेत उभे राहा!
"आषाढी किंवा कार्तिकी यात्रेप्रमाणे अधिक मासात विठ्ठलाचे दर्शन २४ तास सुरू नसते, याची भाविकांनी नोंद घ्यावी. बऱ्याचदा दर्शन बंद झाल्यावरही भाविक रांगेत उभे राहतात आणि त्यांची गैरसोय होते. त्यामुळे विठ्ठल भक्तांनी वेळेचे योग्य नियोजन करूनच रांगेत प्रवेश करावा."
- राजेंद्र शेळके (कार्यकारी अधिकारी, श्री विठ्ठल-रुक्मिणी मंदिर समिती)
असे असेल दर्शनाचे वेळापत्रक:
दर्शन व्यवस्था: दररोज सकाळी ६:०० ते रात्री १२:०० वाजेपर्यंतच दर्शन सुरू राहील.
प्रवेशद्वार बंद होण्याची वेळ: दर्शन रांगेचे मुख्य प्रवेशद्वार रात्री १०:०० वाजता बंद केले जाईल.
श्रींची विश्रांती: रात्री १२:०० ते पहाटे ४:०० या वेळेत दर्शन पूर्णपणे बंद असेल.
नित्यपूजा व आरती: पहाटे ४:०० ते ५:०० या वेळेत काकड आरती आणि नित्यपूजा संपन्न होईल. त्यानंतर पहाटे ५:०० वाजता पुन्हा दर्शनाला सुरुवात होईल.