मुंबई, (प्रतिनिधी) १७ मे - "पंढरपूर येथे विठ्ठल दर्शनासाठी येणाऱ्या माजी सैनिकांची सोय व्हावी, यासाठी तिथे आणि साताऱ्यात भव्य 'एकात्मिक कल्याण केंद्र' उभारण्यात येईल," अशी घोषणा राज्यपाल जिष्णु देव वर्मा यांनी केली. माजी सैनिकांचे पुनर्वसन व पुनर्स्थापनेसाठीच्या विशेष निधी (महाराष्ट्र) समितीच्या ५० व्या वार्षिक बैठकीत ते बोलत होते.
राजभवनातील लोकभवन येथे पार पडलेल्या या बैठकीस माजी सैनिक कल्याण मंत्री शंभूराज देसाई आणि तिन्ही दलांचे वरिष्ठ अधिकारी उपस्थित होते.
वसतिगृहांचे होणार विश्रामगृहात रूपांतर
माजी सैनिकांच्या सोयीसाठी बैठकीत अनेक पायाभूत बदलांना मान्यता देण्यात आली:
नवीन विश्रामगृहे: रत्नागिरी जिल्ह्यातील खेड आणि धुळे येथील 'मिलिटरी बॉईज हॉस्टेल'चे आता 'माजी सैनिक विश्रामगृहात' रूपांतर केले जाणार आहे.
सौर ऊर्जा प्रकल्प: राज्यातील विविध जिल्हा सैनिक कल्याण कार्यालयांच्या अंतर्गत असलेली वसतिगृहे, विश्रामगृहे आणि महासैनिक हॉल येथे सौर ऊर्जा प्रकल्प उभारण्यास मान्यता देण्यात आली. यामुळे वीज बचत आणि पर्यावरण रक्षणास मदत होईल.
वेतनवाढ: पुणे येथील सैनिक कल्याण संचालनालयातील अशासकीय कर्मचाऱ्यांच्या वेतनवाढीलाही यावेळी कार्योत्तर मान्यता देण्यात आली.
माजी सैनिकांना रोजगारात प्राधान्य
राज्यपाल जिष्णु देव वर्मा यांनी समितीमार्फत चालवल्या जाणाऱ्या व्यावसायिक उपक्रमांचा आढावा घेण्याचे निर्देश दिले. या उपक्रमांमध्ये माजी सैनिकांना रोजगारासाठी प्राधान्य मिळावे, अशी सूचना त्यांनी केली. तसेच, मंत्री शंभूराज देसाई यांनी साताऱ्यात केंद्रासाठी जागा उपलब्ध असल्याचे स्पष्ट केल्यावर, या दोन्ही केंद्रांच्या आर्थिक बाबी तपासून सविस्तर प्रस्ताव सादर करण्याचे आदेश राज्यपालांनी दिले.
माजी सैनिक आणि त्यांच्या कुटुंबीयांच्या सामाजिक, शैक्षणिक व आरोग्यविषयक गरजांची पूर्तता करण्यासाठी ही समिती अधिक वेगाने काम करणार आहे.
