मुंबई, (प्रतिनिधी) १६ मे - राज्याचे उपमुख्यमंत्री अजित पवार यांच्या निधनानंतर दोन्ही राष्ट्रवादी काँग्रेस पक्षांचे विलीनीकरण होणार असल्याच्या चर्चांना राजकीय वर्तुळात प्रचंड उधाण आले आहे. अशातच शरद पवार गटाचे युवा नेते आणि आमदार रोहित पवार यांनी यावर अत्यंत रोखठोक प्रतिक्रिया दिली आहे. "दोन्ही पक्ष एकत्रित येण्याचा विषय अजित पवार असताना होता, आता आमच्याकडून तो विषय बाजूला ठेवण्यात आला आहे. मात्र, जर भविष्यात पक्ष एक होणार असेल, तरी मी संघर्ष करण्याचीच भूमिका घेईन, कारण माझा स्वभाव लढणारा आहे," असे सांगत रोहित पवारांनी आपली आक्रमक भूमिका स्पष्ट केली आहे.
तटकरे आणि प्रफुल पटेल 'सिल्व्हर ओक'वर!
अजित पवार गटाचे प्रदेशाध्यक्ष सुनील तटकरे यांच्यापाठोपाठ आता प्रफुल पटेल यांनीही ज्येष्ठ नेते शरद पवार यांची भेट घेतल्याची माहिती रोहित पवारांनी दिली. "सुनील तटकरे आणि प्रफुल पटेल यांचे पवार साहेबांसोबत अनेक वर्षांचे जुने संबंध आहेत. नुकतीच या दोन्ही नेत्यांनी साहेबांची भेट घेतली आहे. मात्र, या दोन्ही बड्या नेत्यांची शरद पवारांसोबत नेमकी काय चर्चा झाली, हे मला माहिती नाही. पक्ष एक करायचा की पुढे काय निर्णय घ्यायचा, हा सर्वस्वी पवार साहेबांचा अधिकार आहे," असे रोहित पवार म्हणाले.
अजित पवार गटात 'ऑल इज नॉट वेल'?
या भेटीगाठींच्या सत्रानंतर अजित पवार गटाच्या अंतर्गत गोटात मोठ्या घडामोडी घडत असल्याचे संकेत रोहित पवारांनी दिले. "ज्या प्रकारे सध्या अजित पवारांच्या पक्षात (राष्ट्रवादी अजित पवार गट) अंतर्गत घडामोडी आणि बैठका सुरू आहेत, त्यावरून त्यांच्या पक्षात सध्या काहीतरी बिनसले असून सर्वकाही व्यवस्थित सुरू नाही, हे स्पष्टपणे लक्षात येत आहे. अर्थात, तो त्यांचा अंतर्गत प्रश्न आहे आणि त्यांनी त्यांचा पक्ष कसा चालवावा हा त्यांचा निर्णय आहे," असा टोलाही त्यांनी लगावला.
पुण्यातील 'गुप्त' बैठकीनंतर रंगले राजकारण
दोन दिवसांपूर्वीच पुण्याच्या एका खाजगी हॉटेलमध्ये शरद पवार गटाच्या प्रमुख नेत्यांची एक गुप्त बैठक पार पडली होती. त्या बैठकीत सुनील तटकरे आणि शरद पवार यांच्या भेटीवर खलबतं झाल्याची माहिती समोर आली होती. आता प्रफुल पटेल यांनीही शरद पवारांची भेट घेतल्याचे उघड झाल्यामुळे आणि त्यावर रोहित पवारांनी "आम्ही विलीनीकरणाचा विषय बाजूला ठेवला आहे" असे सांगितल्यामुळे महाराष्ट्राच्या राजकारणात संभ्रम आणि उत्सुकता दोन्ही कमालीची वाढली आहे.
