शिर्डी, (प्रतिनिधी) १६ मे - भारताच्या लष्करी सामर्थ्याला अधिक बळकट करण्यासाठी आणि संरक्षण क्षेत्रात आत्मनिर्भरता आणण्यासाठी महाराष्ट्र सज्ज झाला आहे. अहिल्यानगर (अहमदनगर) जिल्ह्यातील शिर्डी येथे उभारण्यात आलेल्या अद्ययावत दारूगोळा आणि संरक्षण साहित्य निर्मिती कारखान्याचे (Ammunition Manufacturing Unit) उद्घाटन आगामी २३ मे रोजी देशाचे संरक्षणमंत्री राजनाथ सिंह यांच्या हस्ते होणार आहे.
तोफखान्याचे गोळे आणि एरोस्पेस साहित्याची निर्मिती
'निबे ग्रुप'चे (Nibe Group) अध्यक्ष आणि व्यवस्थापकीय संचालक गणेश निबे यांनी मुंबईत आयोजित पत्रकार परिषदेत या प्रकल्पाची घोषणा केली. राज्याचे जलसंपदा मंत्री तथा जिल्ह्याचे पालकमंत्री डॉ. राधाकृष्ण विखे-पाटील यांच्या उपस्थितीत ही परिषद पार पडली. शिर्डी येथील हा कारखाना तब्बल २०० एकर जागेवर उभारण्यात आला असून, यामध्ये तोफखान्यासाठी लागणारे तोफगोळे (Artillery Bombshells) आणि एरोस्पेस क्षेत्राशी संबंधित महत्त्वाचे सुटे भाग तयार केले जाणार आहेत. विशेष म्हणजे, येथून उत्पादित होणारे संरक्षण साहित्य परदेशात निर्यातही केले जाणार आहे.
२,००० लोकांना रोजगार आणि लघुउद्योगांना चालना
या भव्य प्रकल्पामुळे परिसरातील सुमारे २,००० लोकांना थेट आणि अप्रत्यक्ष रोजगार उपलब्ध होणार आहे. तसेच, या कारखान्याला पूरक साहित्य पुरवण्यासाठी स्थानिक पातळीवरील सूक्ष्म, लघु आणि मध्यम उद्योगांना (MSMEs) मोठ्या प्रमाणावर काम मिळणार असल्याने उद्योग क्षेत्रालाही मोठी चालना मिळेल, असा विश्वास गणेश निबे यांनी व्यक्त केला.
श्रीगोंद्यात २५ हजार टनाचा दुसरा प्रकल्प प्रस्तावित
या पत्रकार परिषदेत आणखी एक मोठी माहिती देण्यात आली. शिर्डीच्या या कारखान्यानंतर आता याच जिल्ह्यात असणाऱ्या श्रीगोंदा येथे तब्बल २५ हजार टन क्षमतेचा दुसरा मोठा दारूगोळा कारखाना उभारण्याचा मानस असल्याचे निबे यांनी सांगितले.
अहिल्यानगर जिल्हा 'डिफेन्स हब' होणार: विखे-पाटील
शिर्डीचे प्रतिनिधित्व करणारे राज्याचे मंत्री राधाकृष्ण विखे-पाटील यावेळी म्हणाले की, "राज्य सरकारला या संपूर्ण परिसराला देशातील एक प्रमुख 'डिफेन्स हब' (संरक्षण केंद्र) म्हणून विकसित करायचे आहे. या प्रकल्पामुळे देशाची लष्करी क्षमता तर वाढेलच, सोबतच या संपूर्ण भागात मोठ्या प्रमाणावर रोजगाराच्या संधी निर्माण होतील."
दिग्गजांची उपस्थिती
२३ मे रोजी होणाऱ्या या ऐतिहासिक उद्घाटन सोहळ्याला संरक्षणमंत्री राजनाथ सिंह यांच्यासह देशाचे चीफ ऑफ डिफेन्स स्टाफ (CDS) जनरल अनिल चव्हाण आणि मुख्यमंत्री देवेंद्र फडणवीस हे देखील उपस्थित राहणार आहेत.