मुंबई, (प्रतिनिधी) ४ मे - तामिळनाडू विधानसभा निवडणुकीच्या निकालांनी दक्षिण भारताच्या राजकारणात एक नवा इतिहास रचला आहे. सुपरस्टार विजय यांच्या 'तमिळगा वेत्री कळघम' (टीव्हीके) पक्षाने प्रस्थापित द्रविडीय राजकारणाला सुरुंग लावत थेट सत्तेच्या दिशेने झेप घेतली आहे. जो अभिनेता कधीकाळी नवीन लोकांशी बोलायला घाबरायचा, तोच आज तामिळनाडूच्या लाखो जनतेचा बुलंद आवाज बनला आहे.
विजय: एक असामान्य प्रवास
८ वीत असताना वडिलांच्या दिग्दर्शनाखाली चित्रपटसृष्टीत प्रवेश.
टर्निंग पॉईंट 'पूवे उनक्कागा' आणि 'काधलुक्कू मरियाधाई' चित्रपटांमुळे घराघरांत पोहोचले.
लोकप्रियता 'इलय्या थलपती' ते 'थलपती' असा प्रवास करत रजनीकांत यांच्यानंतरचे सर्वात मोठे स्टार बनले.
२०१७ पासून राजकारणात 'मर्सल' आणि 'सरकार' सारख्या चित्रपटांतून राजकीय प्रतिमा मजबूत केली.
शांत स्वभावाच्या मुलाचे 'आक्रमक' नेतृत्व!
विजय यांच्याबद्दल एक गोष्ट सर्वांनाच चकीत करते. पडद्यावर प्रचंड उत्साही दिसणारे विजय प्रत्यक्षात अत्यंत शांत आणि संकोची आहेत. वयाच्या दहाव्या वर्षी आपल्या धाकट्या बहिणीला (विद्या) गमावल्यानंतर ते मितभाषी झाले. "मी एकटाच मोठा झालो, कदाचित त्यामुळेच मी असा आहे," असं ते सांगतात. पण, हाच शांत माणूस जेव्हा राजकीय मंचावर येतो, तेव्हा त्याच्या शब्दांना तोफेची धार असते.
समाजकार्य आणि 'सत्ता' यांचा संगम
विजय यांचा राजकारणातील प्रवेश अचानक झालेला नाही. गेल्या १६ वर्षांपासून ते या दृष्टीने तयारी करत होते:
२००८: श्रीलंकन तमिळ बांधवांसाठी चेन्नईत मोठे उपोषण केले.
२००९: 'विजय मक्कल इयक्कम' संस्थेची स्थापना करून समाजकार्य सुरू केले.
मदतकार्य: केरळमधील पूर असो किंवा तमिळनाडूतील आंदोलने, विजय यांनी नेहमीच पीडितांना आर्थिक आणि नैतिक बळ दिले.
२०२४: 'तमिळगा वेत्री कळगम' पक्षाची अधिकृत स्थापना करून प्रत्यक्ष निवडणुकीच्या मैदानात उतरले.
वक्तशीरपणा आणि रणनीती
सिनेमा असो वा राजकारण, विजय आपल्या वक्तशीरपणासाठी ओळखले जातात. ८ वाजताचे शूटिंग असेल तर ते ७:५० ला तयार असतात. राजकारणात आल्यावर त्यांनी 'मौन' हेच आपले शस्त्र बनवले आहे. विरोधकांनी टीका केली तरी त्यांनी आपल्या शांत आणि संयमी कार्यपद्धतीने जनतेचा विश्वास संपादन केला आहे.
एमजीआर यांचा वारसा पुढे नेणार?
राजकीय विश्लेषकांच्या मते, विजय यांच्यामध्ये लोकांना माजी मुख्यमंत्री एमजीआर यांची प्रतिमा दिसते. गरीब आणि कष्टकरी वर्गाला आपल्यातल्या एका नायकामध्ये आपला कैवारी दिसू लागल्यानेच आज तामिळनाडूच्या निकालात 'थलपती' नावाचा चमत्कार घडला आहे.