नंदुरबार, (प्रतिनिधी) १३ फेब्रुवारी - सातपुडा पर्वतरांगांच्या कुशीत वसलेले निसर्गरम्य तोरणमाळ हे राज्यातील एक महत्त्वाचे पर्यटनस्थळ म्हणून ओळखले जाते. या पर्यटनस्थळाच्या सर्वांगीण विकासाला चालना देण्यासाठी तसेच आदिवासी समाजाच्या समृद्ध सांस्कृतिक परंपरेचे दर्शन घडविण्यासाठी 20 ते 22 फेब्रुवारी 2026 या कालावधीत तीन दिवसीय ‘तोरणमाळ महोत्सवा’चे आयोजन करण्यात आले आहे. जिल्हाधिकारी तथा जिल्हा दंडाधिकारी डॉ. मित्ताली सेठी यांनी यासंदर्भात सविस्तर आदेश निर्गमित करून विविध विभागांना स्पष्ट जबाबदाऱ्या सोपविल्या आहेत.
महोत्सव काळात मोठ्या प्रमाणावर पर्यटक व नागरिक उपस्थित राहण्याची शक्यता लक्षात घेता प्रशासनाने नियोजनबद्ध पद्धतीने सर्व यंत्रणा सज्ज ठेवण्याचे निर्देश दिले आहेत.
कायदा-सुव्यवस्था व वाहतूक नियंत्रण
जिल्हा पोलीस अधीक्षक कार्यालयास कार्यक्रमस्थळी कायदा व सुव्यवस्था अबाधित राखणे, गर्दी नियंत्रण तसेच वाहतुकीचे सुयोग्य नियमन करण्याची जबाबदारी देण्यात आली आहे. कार्यक्रमादरम्यान पर्यटकांना कोणताही अडथळा येऊ नये यासाठी आवश्यक पोलीस बंदोबस्त तैनात केला जाणार आहे.
पर्यटन व सांस्कृतिक कार्यक्रमांचे नियोजन
सहाय्यक जिल्हाधिकारी तथा प्रकल्प अधिकारी, एकात्मिक आदिवासी विकास प्रकल्प, तळोदा यांच्याकडे संपूर्ण सांस्कृतिक कार्यक्रमांचे नियोजन, समन्वय व अंमलबजावणीची जबाबदारी देण्यात आली आहे. स्थानिक कलाकारांना व्यासपीठ उपलब्ध करून देत आदिवासी नृत्य, लोककला, हस्तकला व पारंपरिक परंपरांचा उत्सव साजरा केला जाणार आहे.
वनविभागाची भूमिका
तोरणमाळ हे वनक्षेत्रात असल्याने वनविभागास पर्यटकांची सुरक्षितता, नैसर्गिक पर्यावरणाचे संवर्धन तसेच कार्यक्रमासाठी आवश्यक तात्पुरत्या परवानग्या देण्याचे निर्देश देण्यात आले आहेत. वनक्षेत्रातील कोणतीही बाधा टाळण्यासाठी विशेष दक्षता घेतली जाणार आहे.
स्वच्छता, पाणीपुरवठा व आरोग्य सुविधा
महोत्सवादरम्यान स्वच्छतेसाठी विशेष पथके तैनात केली जाणार असून मोबाईल शौचालयांची व्यवस्था केली जाणार आहे. पिण्याच्या पाण्याची उपलब्धता सुनिश्चित करण्याचे निर्देश देण्यात आले आहेत. जिल्हा आरोग्य अधिकारी व जिल्हा शल्यचिकित्सक यांना प्राथमिक उपचार केंद्र, वैद्यकीय पथके, रुग्णवाहिका आदी सुविधा उपलब्ध करून देण्याचे आदेश देण्यात आले आहेत.
आपत्ती व्यवस्थापन व वीजपुरवठा
जिल्हा आपत्ती व्यवस्थापन प्राधिकरणास आपत्कालीन परिस्थितीसाठी सज्ज राहण्याच्या सूचना देण्यात आल्या आहेत. महावितरण विभागास अखंडित वीजपुरवठा राखण्याची जबाबदारी सोपविण्यात आली आहे. सार्वजनिक बांधकाम विभागास रस्ते व पायाभूत सुविधा सुस्थितीत ठेवण्याचे निर्देश देण्यात आले आहेत.
वाहतूक सुविधा
महाराष्ट्र राज्य मार्ग परिवहन महामंडळ तसेच स्थानिक परिवहन यंत्रणेस पर्यटकांच्या सोयीसाठी अतिरिक्त बस फेऱ्या व आवश्यक वाहतूक व्यवस्था करण्याचे आदेश देण्यात आले आहेत. वाहतूक कोंडी टाळण्यासाठी नियोजनबद्ध उपाययोजना करण्यात येणार आहेत.
प्रशासनाची काटेकोर तयारी
जिल्हाधिकारी डॉ. मिताली सेठी यांनी सर्व संबंधित अधिकाऱ्यांना आदेशातील निर्देशांचे काटेकोर पालन करून सोपविलेली जबाबदारी सक्षमपणे पार पाडण्याचे निर्देश दिले आहेत. सर्व विभागांनी परस्पर समन्वय राखून महोत्सव यशस्वी करण्याचे आवाहन करण्यात आले आहे.
पर्यटनाला नवी दिशा
‘तोरणमाळ महोत्सव’ हा केवळ सांस्कृतिक उत्सव नसून जिल्ह्याच्या पर्यटन क्षमतेला नवी ओळख देणारा उपक्रम ठरणार आहे. स्थानिक अर्थव्यवस्थेला चालना, आदिवासी कला-संस्कृतीचे जतन व प्रसार, तसेच नंदुरबार जिल्ह्याची सकारात्मक प्रतिमा राज्यभर पोहोचविण्याच्या दृष्टीने हा महोत्सव महत्त्वपूर्ण ठरणार आहे.
'सुपरफास्ट नाशिक'चे मुख्य संपादक, ज्येष्ठ पत्रकार आणि लेखक भावेश ब्राह्मणकर यांचे 'अरुणोदय' पुस्तक प्रकाशन पूर्व बुकिंगसाठी उपलब्ध झाले आहे.
प्रथितयश दिलीपराज प्रकाशनाने २५ टक्के घसघशीत सूट त्यासाठी दिली आहे.
पुस्तक बुकिंगसाठी खालील लिंकवर क्लिक करावे
https://www.diliprajprakashan.in/products/arunoday-by-bhavesh-brahmankar
