मुंबई, (प्रतिनिधी) ११ फेब्रुवारी - दिवंगत उपमुख्यमंत्री अजित पवार यांच्या प्रकृतीबाबत आणि त्यांच्या विमान प्रवासाबाबत आमदार रोहित पवार यांनी अत्यंत गंभीर आणि खळबळजनक दावे केले आहेत. अजितदादांच्या शरीराला आलेली सूज ही नैसर्गिक नव्हती, तर ती 'अॅबनॉर्मल' (असामान्य) होती, असा दावा करत त्यांनी या प्रकरणाच्या सखोल चौकशीची मागणी केली आहे.
'ती सूज अॅबनॉर्मल होती' - डॉक्टरांच्या हवाल्याने संशय
काही दिवसांपूर्वी अजित पवार भाजल्याची माहिती समोर आली होती. याच संदर्भात भाष्य करताना रोहित पवार म्हणाले की, भाजल्यानंतर शरीर सुजते हे मान्य असले तरी, अजितदादांची बॉडी कमालीची सुजलेली होती.
"मी जेव्हा डॉक्टरांशी बोललो, तेव्हा त्यांनी सांगितले की भाजल्यावर सूज येते. मात्र, अजितदादांच्या बाबतीत ही सूज असामान्य होती. ती इतकी का सुजलेली होती, हे पाहणं तांत्रिक आणि वैद्यकीयदृष्ट्या अत्यंत महत्त्वाचं आहे," असे पवार यांनी नमूद केले.
पायलट बदलण्यावरून संशयाची सुई
रोहित पवार यांनी केवळ आरोग्यावरच नाही, तर अजित पवारांच्या विमान प्रवासाच्या नियोजनावरही प्रश्नचिन्ह उपस्थित केले आहे. त्यांच्या दाव्यानुसार, ऐनवेळी वैमानिक बदलण्यात आले आणि त्यामागे देण्यात आलेले कारण पटण्यासारखे नाही.
रोहित पवार यांनी उपस्थित केलेले मुद्दे:
ट्रॅफिकचे कारण संशयास्पद: नियोजित वैमानिक कॅप्टन मदान आणि त्यांचा क्रू ट्रॅफिकमध्ये अडकल्याने सुमित कपूर यांना आयत्यावेळी पाचारण करण्यात आले. परंतु, सकाळी साडेसहा वाजता मुंबईत ट्रॅफिक कुठे असते? असा सवाल पवारांनी विचारला आहे.
सीसीटीव्ही तपासणीची मागणी: खरोखरच कॅप्टन मदान ट्रॅफिकमध्ये अडकले होते का, हे स्पष्ट करण्यासाठी त्या मार्गावरील सीसीटीव्ही फुटेज तपासले जावे, अशी मागणी त्यांनी केली आहे.
वैमानिकावर आक्षेप: "आमचा कॅप्टन शांभवी पाठक यांच्यावर कोणताही आक्षेप नाही, मात्र मुख्य वैमानिक सुमित कपूर यांच्यावर आमचा आक्षेप आहे," असे सांगत त्यांनी या प्रक्रियेत काहीतरी काळेबेरे असल्याचे संकेत दिले आहेत.
राजकीय वर्तुळात चर्चांना उधाण
रोहित पवार यांच्या या विधानांमुळे राजकीय वर्तुळात मोठी खळबळ उडाली आहे. हा केवळ अपघाताचा किंवा प्रकृतीचा भाग आहे की यामागे काही मोठे कारस्थान आहे? अशी चर्चा आता सुरू झाली आहे. यावर आता सत्ताधारी पक्ष किंवा स्वतः अजित पवार गट काय स्पष्टीकरण देणार, याकडे सर्वांचे लक्ष लागले आहे.
'सुपरफास्ट नाशिक'चे मुख्य संपादक, ज्येष्ठ पत्रकार आणि लेखक भावेश ब्राह्मणकर यांचे 'अरुणोदय' पुस्तक प्रकाशन पूर्व बुकिंगसाठी उपलब्ध झाले आहे.
प्रथितयश दिलीपराज प्रकाशनाने २५ टक्के घसघशीत सूट त्यासाठी दिली आहे.
पुस्तक बुकिंगसाठी खालील लिंकवर क्लिक करावे
https://www.diliprajprakashan.in/products/arunoday-by-bhavesh-brahmankar
