नाशिक, (प्रतिनिधी) १ फेब्रुवारी - पुढील वर्षी नाशिक आणि त्र्यंबकेश्वर येथे होणारा सिंहस्थ कुंभमेळा २०२७ हा केवळ एक धार्मिक सोहळा नसून तो भारताचा मोठा सांस्कृतिक ठेवा आहे. या ऐतिहासिक सोहळ्याचे सूक्ष्म नियोजन करून त्याचे परिपूर्ण दस्तऐवजीकरण करण्यात यावे, असे महत्त्वपूर्ण निर्देश केंद्रीय सांस्कृतिक व पर्यटन मंत्री गजेंद्रसिंह शेखावत यांनी आज येथे दिले.
जिल्हाधिकारी कार्यालयातील मध्यवर्ती सभागृहात आयोजित सिंहस्थ कुंभमेळा पूर्वतयारी व पायाभूत सुविधांच्या आढावा बैठकीत ते बोलत होते. यावेळी व्यासपीठावर राष्ट्रीय महिला आयोगाच्या अध्यक्षा विजया रहाटकर, विभागीय आयुक्त डॉ. प्रवीण गेडाम, कुंभमेळा विकास प्राधिकरणाचे आयुक्त शेखर सिंह, जिल्हाधिकारी आयुष प्रसाद आणि मनपा आयुक्त मनीषा खत्री यांची प्रमुख उपस्थिती होती.
'रामकाल पथ'मध्ये उमटणार रामायणाचे प्रतिबिंब
कुंभमेळ्याच्या नियोजनाबाबत बोलताना केंद्रीय मंत्री शेखावत म्हणाले की, भाविकांना रामायण काळाची प्रचिती येईल अशा पद्धतीने 'रामकाल पथ'ची निर्मिती करावी. ही रचना साकारताना स्थानिक वास्तुकलेचा मेळ घालावा आणि रंगसंगतीसाठी चित्रकला शाखेच्या स्थानिक विद्यार्थ्यांची मदत घ्यावी. कुंभमेळ्याचे महत्त्व अधिकारी व कर्मचाऱ्यांपर्यंत पोहोचवण्यासाठी त्यांच्या विशेष कार्यशाळा आयोजित कराव्यात, अशा सूचनाही त्यांनी दिल्या.
पायाभूत सुविधा व गर्दी व्यवस्थापनावर भर
देश-विदेशातून येणाऱ्या लाखो भाविकांच्या सोयीसाठी शेखावत यांनी खालील बाबींचे तातडीने नियोजन करण्याचे निर्देश दिले:
* मोबाईल नेटवर्क: गर्दीच्या काळात संपर्क व्यवस्था कोलमडू नये यासाठी आतापासूनच उपाययोजना कराव्यात.
* पाणी व हेल्पलाईन: भाविकांच्या सोयीसाठी ठिकठिकाणी पिण्याच्या पाण्याची सोय आणि प्रभावी हेल्पलाईन सुविधा कार्यान्वित करावी.
* सर्वसमावेशक आराखडा: त्र्यंबकेश्वर येथील विकासकामांचा परिपूर्ण प्रस्ताव राज्य शासनामार्फत तातडीने सादर करावा.
* हवाई दळणवळण: नाशिक आणि त्र्यंबकेश्वर दरम्यान हवाई दळणवळणाच्या सुविधा उपलब्ध होऊ शकतात का, याची तांत्रिक पडताळणी करावी.
स्थानिक सहभाग आणि ब्रँडिंग
कुंभमेळ्याच्या नियोजनात महिला, तरुण आणि समाजातील विविध घटकांचा सहभाग वाढवावा. नाशिक जिल्ह्यातील धार्मिक व ऐतिहासिक पर्यटनाची जागतिक स्तरावर ओळख निर्माण करण्यासाठी विशेष 'ब्रँडिंग' करावे, असेही त्यांनी नमूद केले.
बैठकीच्या सुरुवातीला विभागीय आयुक्त डॉ. गेडाम आणि कुंभमेळा आयुक्त शेखर सिंह यांनी साधूग्राम, दर्शन पथ, भूसंपादन आणि बाधितांचे पुनर्वसन या विषयांवर सादरीकरण करून सद्यस्थितीची माहिती दिली. बैठकीस सार्वजनिक बांधकाम विभागाच्या अधीक्षक अभियंता अरुंधती शर्मा, एमटीडीसीचे प्रादेशिक व्यवस्थापक जगदीश चव्हाण यांसह विविध विभागांचे वरिष्ठ अधिकारी उपस्थित होते.
