नाशिक, (प्रतिनिधी) ३ नोव्हेंबर - किरकोळ वादातून शिवीगाळ करत एका तरुणाच्या डोक्यात दगडी फरशीचा तुकडा मारून त्याची निघृण हत्या केल्याप्रकरणी जिल्हा व सत्र न्यायालयाने आरोपीस दोषी ठरवून जन्मठेप आणि पाच हजार रुपये दंडाची सक्त मजुरीची शिक्षा सुनावली आहे. तसेच, या घटनेत कुटुंबाने आपला कर्ता पुरुष गमावल्याचे अधोरेखित करत न्यायालयाने आरोपीस एका महिन्याच्या आत मृताच्या आई-वडिलांना एक लाख रुपयांची नुकसानभरपाई देण्याचेही आदेशात स्पष्ट केले आहे.
आनंद देवराम आंबेकर (वय २९, रा. महादेव मंदिराजवळ, शिवपुरी चौक, पंडितनगर, सिडको) असे जन्मठेपेची शिक्षा सुनावण्यात आलेल्या आरोपीचे नाव आहे.
काय घडली होती घटना?
ही दुर्दैवी घटना ५ फेब्रुवारी २०२४ रोजी सायंकाळच्या सुमारास सिडकोतील कामटवाडा रोडवरील मरीमाता मंदिर परिसरात घडली होती. याप्रकरणी वसंत सखाराम इंगळे (रा. मीनाताई ठाकरे शाळेसमोर, कामटवाडे) यांनी अंबड पोलीस ठाण्यात रीतसर फिर्याद दिली होती.
घटनेच्या दिवशी आरोपी आनंद आंबेकर आणि मृत आनंदा वसंत इंगळे (वय ३०) या दोघांमध्ये किरकोळ कारणावरून वाद झाला होता. या वादाचे रूपांतर नंतर मोठ्या भांडणात झाले. आरोपीने आनंदा इंगळे यास जातीवाचक शिवीगाळ करत जवळच पडलेला दगडी फरशीचा तुकडा उचलून त्याच्या डोक्यात बेदम मारला. फरशीचा वार अत्यंत गंभीर असल्याने या घटनेत आनंदाचा जागीच मृत्यू झाला.
अ‍ॅट्रॉसिटीसह खुनाचा गुन्हा दाखल
या प्रकरणाचे गांभीर्य लक्षात घेऊन पोलिसांनी आरोपी आनंद आंबेकर याच्याविरोधात भारतीय दंड संहितेच्या (IPC) कलम ३०२ (खून) सह अनुसूचित जाती-जमाती (अत्याचार प्रतिबंधक) कायद्यान्वये (अ‍ॅट्रॉसिटी) गुन्हा दाखल केला होता. या गुन्ह्याचा सखोल तपास तत्कालीन सहाय्यक पोलीस आयुक्त शेखर देशमुख यांनी केला. त्यांनी सर्व घटनास्थळाचा पंचनामा, प्रत्यक्षदर्शींची साक्ष आणि भक्कम परिस्थितिजन्य पुरावे गोळा करून न्यायालयात दोषारोपपत्र (Charge Sheet) दाखल केले.
न्यायालयाचा निर्णय आणि नुकसानभरपाई
हा खटला कोर्ट क्रमांक १ च्या जिल्हा व सत्र न्यायाधीश श्रीमती आर. एन. पांढरे यांच्या न्यायालयात चालला. सरकार पक्षातर्फे अतिरिक्त सरकारी अभियोक्ता भानुप्रिया पेटकर आणि आर. पी. गावित यांनी बाजू मांडली.
सुनावणी दरम्यान फिर्यादी, साक्षीदार आणि पंचांची साक्ष तसेच तपासी अधिकाऱ्यांनी सादर केलेले भक्कम परिस्थितिजन्य पुरावे न्यायाधीशांनी ग्राह्य धरले. आरोपीवरील खुनाचा गुन्हा सिद्ध झाल्याने न्यायालयाने आरोपी आनंद आंबेकर यास जन्मठेपेची शिक्षा आणि पाच हजार रुपये दंडाची शिक्षा सुनावली.
याशिवाय, मृत आनंदा हा कुटुंबातील कर्ता पुरुष होता. त्याच्या अचानक जाण्यामुळे वृद्ध आई-वडिलांवर मोठा आघात झाला आहे, ही बाब लक्षात घेऊन न्यायालयाने आरोपीला आदेश दिले आहेत की, त्याने एका महिन्याच्या आत मृताच्या आई-वडिलांना १ लाख रुपयांची आर्थिक नुकसानभरपाई द्यावी. न्यायालयाच्या या निकालामुळे पीडित कुटुंबाला उशिरा का होईना न्याय मिळाल्याची भावना व्यक्त होत आहे.