नाशिक, (प्रतिनिधी) ३० ऑक्टोबर - राष्ट्रीय आरोग्य अभियानांतर्गत (NHM) दीर्घकाळ सेवा बजावणाऱ्या कर्मचाऱ्यांसाठी राज्य शासनाने एक महत्त्वपूर्ण आणि दिलासादायक निर्णय घेतला आहे. तांत्रिक खंड वगळून १० वर्षे किंवा त्यापेक्षा अधिक कंत्राटी सेवा पूर्ण केलेल्या नाशिक जिल्ह्यातील ५४२ कंत्राटी कर्मचाऱ्यांसाठी एकवेळची विशेष बाब म्हणून समकक्ष वेतनश्रेणीतील अधिसंख्य पदे निर्माण करण्यास शासनाने मान्यता दिली आहे. या निर्णयामुळे आरोग्य कर्मचाऱ्यांना मोठा दिलासा मिळाला असून नाशिक जिल्हा परिषदेचे मुख्य कार्यकारी अधिकारी ओमकार पवार आणि जिल्हा आरोग्य अधिकारी डॉ. राजेंद्र बागूल यांनी सर्व पात्र कर्मचाऱ्यांचे अभिनंदन केले आहे.
निर्णयाची प्रमुख वैशिष्ट्ये व सेवा अटी:
समकक्ष वेतनश्रेणी व भत्ते: सार्वजनिक आरोग्य, ग्रामविकास व इतर विभागांतील समकक्ष नियमित मंजूर पदांच्या सेवाप्रवेश नियमांनुसार कर्मचाऱ्यांना वेतनश्रेणी दिली जाईल. कर्मचाऱ्यांचे सध्याचे मूळ वेतन संरक्षित राहील, तसेच त्यांना महागाई भत्ता आणि प्रवास भत्ता लागू केला जाईल.
वार्षिक खर्च: या कर्मचाऱ्यांच्या अपेक्षित वेतनासाठी आणि प्रवास भत्त्यासाठी राज्य स्तरावर सुमारे ५ कोटी रुपयांच्या खर्चास मंजुरी देण्यात आली आहे.
रजांची सुविधा: राष्ट्रीय आरोग्य अभियानाच्या नियमांनुसार सध्या देय असलेल्या सर्व रजा या कर्मचाऱ्यांना अनुज्ञेय राहतील.
अधिसंख्य पदांचे स्वरूप व मर्यादा:
व्यक्तिसापेक्ष पदे: ही निर्माण केलेली अधिसंख्य पदे पूर्णपणे व्यक्तिसापेक्ष असतील. म्हणजेच संबंधित कर्मचारी सेवेत कार्यरत असेपर्यंतच ही पदे अस्तित्वात राहतील.
पद व्यपगत होणे: कमाल वयोमर्यादा, राजीनामा, आजारपण किंवा मृत्यूमुळे पद रिक्त झाल्यास ते आपोआप रद्द (व्यपगत) होईल. त्यावर कोणतीही नवी नियुक्ती केली जाणार नाही.
अटी व अपवाद: या कर्मचाऱ्यांना पदोन्नती, आश्वासित प्रगती योजना, सेवानिवृत्ती/कुटुंब निवृत्तीवेतन योजना आणि वारसांना अनुकंपा तत्त्वावरील नियुक्तीचा लाभ मिळणार नाही.
विशेष बाब: शासनाने या पदनिर्मितीला अपवादात्मक स्थितीत 'एकवेळची विशेष बाब' म्हणून मान्यता दिली आहे. त्यामुळे इतर कोणत्याही विभागासाठी याचा पूर्वोदाहरण (Precedent) म्हणून वापर करता येणार नाही.
"राष्ट्रीय आरोग्य अभियानांतर्गत नाशिक जिल्ह्यातील ५४२ कंत्राटी कर्मचाऱ्यांसाठी अधिसंख्य पदे निर्माण करून त्यांना नियुक्ती देण्याच्या निर्णयामुळे दीर्घकाळ सेवा देणाऱ्या कर्मचाऱ्यांना मोठा दिलासा मिळाला आहे. यामुळे जिल्ह्यातील सार्वजनिक आरोग्य सेवा अधिक सक्षम, गुणवत्तापूर्ण व लोकाभिमुख होण्यास मदत होईल."
— ओमकार पवार (मुख्य कार्यकारी अधिकारी, जिल्हा परिषद नाशिक)