नाशिक, (प्रतिनिधी) २९ ऑक्टोबर - शहरातून एक अत्यंत मन हेलावून टाकणारी आणि दुःखद घटना समोर आली आहे. घरातील बाथरूममध्ये ठेवलेल्या पाण्याने भरलेल्या बादलीत तोल जाऊन पडल्यामुळे अवघ्या अकरा महिन्यांच्या चिमुरडीचा दुर्दैवी मृत्यू झाला आहे. जेलरोड भागातील पेंढारकर कॉलनी परिसरात ही दुर्घटना घडली. रेवा राहुल ठाकरे असे मृत पावलेल्या दुर्दैवी चिमुरडीचे नाव आहे. या घटनेमुळे परिसरात शोककळा पसरली असून सर्वत्र हळहळ व्यक्त केली जात आहे.
नेमकी घटना कशी घडली?
पोलिसांकडून मिळालेल्या माहितीनुसार, रेवा राहुल ठाकरे ही ११ महिन्यांची चिमुरडी बुधवारी (दि. २८) सायंकाळच्या सुमारास नेहमीप्रमाणे आपल्या घरात खेळत होती. घरातील खेळ, तिचा बालिश व गोड वावर यामुळे संपूर्ण कुटुंबात आनंदाचे वातावरण होते. खेळता खेळता चिमुकली रेवा घरातील बाथरूमच्या दिशेने गेली.
बाथरूममध्ये आधीपासूनच कपडे धुण्यासाठी किंवा वापरासाठी पाण्याने भरलेली एक बादली ठेवली होती. खेळण्याच्या नादात रेवाने त्या बादलीत डोकावले असता, अचानक तिचा तोल गेला आणि ती थेट पाण्याने भरलेल्या बादलीत उलटी पडली. लहान असल्यामुळे तिला स्वतःचा बचाव करता आला नाही आणि पाण्यामध्ये गुदमरल्यामुळे तिचा जागीच श्वास अडकला.
उपचारापूर्वीच प्राण सोडले
काही वेळ झाल्यानंतर कुटुंबातील सदस्यांचे लक्ष रेवाकडे गेले असता, ती बाथरूममधील बादलीत पडल्याचे त्यांच्या निदर्शनास आले. हे दृश्य पाहताच कुटुंबियांच्या पायाखालची जमीनच सरकली. त्यांनी क्षणाचाही विलंब न लावता रेवाहाला तातडीने उपचारासाठी नाशिक महानगरपालिकेच्या बिटको रुग्णालयात दाखल केले.
परंतु, रुग्णालयात पोहोचण्यापूर्वीच उशीर झाला होता. येथील वैद्यकीय अधिकारी डॉ. अंकिता शिरसाठ यांनी रेवाहाला तपासणीसाठी हाती घेतले असता, उपचारापूर्वीच तिचा मृत्यू झाल्याचे घोषित केले. अवघ्या ११ महिन्यांच्या लेकीने अकाली डोळे मिटल्याने ठाकरे कुटुंबावर दुःखाचा डोंगर कोसळला असून आई-वडिलांच्या हंबरड्याने उपस्थितांचेही मन हेलावले.
उपनगर पोलीस ठाण्यात नोंद
याप्रकरणी उपनगर पोलीस ठाण्यात आकस्मिक मृत्यूची नोंद करण्यात आली असून पुढील कायदेशीर प्रक्रिया पूर्ण करण्यात आली आहे. या दुर्दैवी घटनेचा पुढील तपास पोलीस हवालदार हिवाळे यांच्याकडून केला जात आहे.
पालकांसाठी धोक्याची घंटा
घरातील लहान मुले अत्यंत चंचल असतात आणि त्यांना आजूबाजूच्या परिस्थितीची फारशी जाणीव नसते. अशा वेळी घरात पाणी भरून ठेवलेल्या बादल्या, हंडे किंवा इतर भांडी नेहमी झाकून ठेवणे किती गरजेचे आहे, याची प्रचिती या घटनेने पुन्हा एकदा दिली आहे. किंचितसे दुर्लक्ष किंवा क्षणिक नजरचुकीमुळे किती मोठा अनर्थ ओढवू शकतो, याचे हे अत्यंत वेदनादायी उदाहरण ठरले आहे. या दुर्दैवी घटनेमुळे जेलरोड परिसरामध्ये तीव्र शोक व्यक्त होत आहे.