येवला, (प्रतिनिधी) २५ ऑक्टोबर - मराठी भावगीतांची समृद्ध परंपरा, भक्तिसंगीताचा भावस्पर्शी अनुभव आणि सुरेल गायनाची अविस्मरणीय मैफल अशा संगीतमय वातावरणात येथील रसिक श्रोते मंत्रमुग्ध झाले. गायक प्रथमेश लघाटे आणि शमिका भिडे यांच्या सुमधुर स्वरांनी सजलेल्या ‘मर्मबंधातील ठेव’ या भावगीतांच्या कार्यक्रमाला येवलेकरांनी उत्स्फूर्त प्रतिसाद दिला. गीत-संगीताच्या माध्यमातून रसिकांच्या मनाचा ठाव घेणाऱ्या या कार्यक्रमामुळे महात्मा फुले नाट्यगृहात सांगीतिक आनंदाची अनुभूती अनुभवायला मिळाली.
येवला शहरातील सांस्कृतिक वैभव असलेल्या महात्मा फुले नाट्यगृहात राज्याचे अन्न, नागरी पुरवठा व ग्राहक संरक्षण मंत्री छगन भुजबळ यांच्या संकल्पनेतून हा कार्यक्रम प्रायोगिक तत्त्वावर आयोजित करण्यात आला होता. या कार्यक्रमाला मंत्री छगन भुजबळ, माजी खासदार समीर भुजबळ, आमदार पंकज भुजबळ, डॉ. शेफाली भुजबळ आणि देविशा भुजबळ यांची प्रमुख उपस्थिती होती.
प्रथमेश लघाटे आणि शमिका भिडे यांनी आपल्या सुमधुर आवाजातून विविध गीतांचे सादरीकरण करत उपस्थितांची मने जिंकली. ‘नमो एकदंता’, ‘एकदंताय वक्रतुंडाय’, ‘खेळ मांडियेला वाळवंटी’ यांसारख्या रचनांसह विविध अभंग आणि भावगीतांनी मैफलीत रंग भरला. भक्तिसंगीतातील आर्तता, भावगीतांमधील भावपूर्णता आणि स्वरांमधील माधुर्य यांचा सुंदर मिलाफ या सादरीकरणातून अनुभवायला मिळाला. गीतांच्या सुरेल सादरीकरणाला उपस्थित रसिकांनी उत्स्फूर्त दाद दिली.
मराठी संगीत परंपरेतील भावगीतांना रसिकांच्या मनात आजही विशेष स्थान आहे. या गीतांमधून व्यक्त होणाऱ्या भावना, शब्दांचे सौंदर्य आणि स्वरांची जादू यांचा अनुभव ‘मर्मबंधातील ठेव’ या कार्यक्रमातून रसिकांना घेता आला. नव्या पिढीतील गायकांच्या सादरीकरणातून मराठी संगीताचा वारसा नव्या रसिकांपर्यंत पोहोचण्यास अशा कार्यक्रमांची मदत होते. येवला शहराच्या सांस्कृतिक जीवनात महात्मा फुले नाट्यगृहाला विशेष महत्त्व आहे. नाट्य, संगीत आणि सांस्कृतिक कार्यक्रमांच्या माध्यमातून शहरातील नागरिकांना दर्जेदार कलाविष्कार अनुभवता यावेत, या उद्देशाने आयोजित करण्यात आलेल्या या कार्यक्रमाने नाट्यगृहातील सांस्कृतिक उपक्रमांना नवी रंगत दिली. संगीतप्रेमी नागरिकांना एकत्र आणणाऱ्या या मैफलीतून येवलेकरांना मराठी भावगीतांचा आनंद घेण्याची संधी मिळाली.
या कार्यक्रमाला माजी आमदार मारोतीराव पवार, ज्येष्ठ नेते अंबादास बनकर, प्रांताधिकारी बाबासाहेब गाढवे, तहसीलदार आबा महाजन, येवला विधानसभा अध्यक्ष वसंत पवार, संभाजी पवार, भाऊसाहेब भवर, साहेबराव मढवई, नगराध्यक्ष राजेंद्र लोणारी, शहराध्यक्ष दत्ता निकम, मोहन शेलार, संजय बनकर, नगरसेवक दीपक लोणारी, व्यंगचित्रकार प्रा. प्रभाकर झळके, सचिन कळमकर, सुहास भांबारे, समाधान जेजुरकर, रतन बोरनारे, नवनाथ काळे, मच्छिंद्र थोरात, अकलेश कासलीवाल, सुनील पैठणकर, पांडुरंग राऊत, नितीन गायकवाड, मलिक शेख, संतोष खैरनार, भाऊसाहेब धनवटे, दीपक गायकवाड, मनोज रंधे, भूषण लाघवे, सुमित थोरात आणि सचिन सोनवणे यांच्यासह विविध क्षेत्रांतील मान्यवर, पदाधिकारी, कार्यकर्ते आणि येवलेकर मोठ्या संख्येने उपस्थित होते.
सुरेल गीतांचा आनंद, भावस्पर्शी सादरीकरण आणि रसिकांचा उत्स्फूर्त प्रतिसाद अशा वातावरणात ‘मर्मबंधातील ठेव’ या कार्यक्रमाने येवलेकरांच्या मनात संगीताच्या अविस्मरणीय आठवणी निर्माण केल्या.