मुंबई, (प्रतिनिधी) २२ ऑक्टोबर - मतदान प्रक्रियेत पारदर्शकता असायलाच हवी, नागरिकांना आपण दिलेले मत योग्य ठिकाणीच पडल्याचे समाधान मिळाले पाहिजे, अशी ठाम भूमिका मांडत महाराष्ट्र नवनिर्माण सेनेचे अध्यक्ष राज ठाकरे यांनी पुन्हा एकदा ईव्हीएम (EVM) प्रणालीवर गंभीर प्रश्नचिन्ह उपस्थित केले आहे. मुंबई प्रेस क्लबच्या इमारतीत ज्येष्ठ छायाचित्रकार गजानन दुधाळकर यांच्या ‘डान्स ऑफ डेमोक्रसी’ या छायाचित्र प्रदर्शनाचे उद्घाटन आज राज ठाकरे यांच्या हस्ते झाले. यानंतर झालेल्या विशेष पत्रकार परिषदेत त्यांनी देश आणि राज्यातील विविध ज्वलंत राजकीय व सामाजिक मुद्द्यांवर रोखठोक भाष्य केले.
ईव्हीएम आणि पारदर्शकतेचा मुद्दा
पत्रकारांशी संवाद साधताना राज ठाकरे म्हणाले की, "मी २०१८ पासून देशात बॅलेट पेपरवर निवडणुका व्हाव्यात, यासाठी सातत्याने प्रयत्न करत आहे. त्यावेळी मी देशातील अनेक बडे नेते आणि निवडणूक आयुक्तांचीही भेट घेतली होती. त्यावेळी मी नेमके काय सांगत होतो, हे अनेकांना तेव्हा समजले नाही; परंतु आज त्याची व्याप्ती लोकांना समजत आहे. जगातील बहुतांश पुढारलेल्या देशांमध्ये आजही बॅलेट पेपरवरच मतदान घेतले जाते. फ्रान्सचे उदाहरण देत त्यांनी स्पष्ट केले की, तिथे एका मतदाराने तक्रार केल्यानंतर तिथली ईव्हीएम मशीन्स बंद करून पुन्हा बॅलेट पेपरवर मतदान सुरू करण्यात आले. मग भारतातच ईव्हीएमचा अट्टाहास कशाला हवा?" असा सवाल त्यांनी यावेळी उपस्थित केला.
पुढील ३-४ महिन्यांत देशात मोठी राजकीय उलथापालथ होण्याची शक्यता
सध्याच्या राजकीय व सामाजिक परिस्थितीवर तीव्र चिंता व्यक्त करत राज ठाकरे यांनी आगामी काळात देशात मोठी राजकीय गडबड होण्याचे भाकीत केले. ते म्हणाले की, "पुढील साधारण ३ ते ४ महिन्यांमध्ये या देशात काहीतरी मोठी गडबड होईल, हे निश्चित आहे. सरकारकडून सातत्याने चुका केल्या जात आहेत. आगामी काळात सरकारमधील अनेक काळे ढग आणि लपवलेल्या गोष्टी चव्हाट्यावर येतील. ज्या पद्धतीने परिस्थिती बिघडत चालली आहे, ते पाहता येत्या काही महिन्यांत संपूर्ण देश रस्त्यावर उतरला तरी मला मुळीच आश्चर्य वाटणार नाही."
दुष्काळ आणि प्रशासकीय अपयश
महाराष्ट्रातील शेतीच्या व शेतकऱ्यांच्या बिकट स्थितीवर बोलताना त्यांनी सरकारवर ताशेरे ओढले. सरकारने महाराष्ट्रातील तब्बल ३०० ते ३२५ तालुक्यांमध्ये दुष्काळ जाहीर केला आहे; परंतु ही परिस्थिती भविष्यात आणखी भीषण होणार आहे. प्रशासनाची कोणतीही पूर्वतयारी नसल्यामुळे ही हाताबाहेर गेलेली परिस्थिती सरकारला अजिबात झेपणार नाही, अशी भीती त्यांनी व्यक्त केली.
अभिव्यक्ती स्वातंत्र्य आणि पोलिस यंत्रणेला ‘फ्री हँड’ देण्याची मागणी
कलाकारांच्या अभिव्यक्ती स्वातंत्र्यावर बोलताना राज ठाकरे म्हणाले की, अमेरिकेत कलाकार राष्ट्राध्यक्षांच्या विरोधात किंवा त्यांच्या भूमिकेवर उघडपणे मते मांडतात, म्हणून लगेच त्यांच्या चित्रपटांवर बहिष्कार टाकला जात नाही. मात्र, आपल्या देशात त्याच भीतीपोटी अनेक कलाकार उघडपणे बोलण्याचे धाडस करत नाहीत. सबीर भाटीया यांनी गौतम अदानी यांच्यावर एक माहितीपट (डॉक्युमेंट्री) बनवला आहे, तो काढून टाकण्यास सांगितल्याचा प्रकार चुकीचा असल्याचे सांगत "लोकांना ती पाहू दे, प्रत्येक वेळी भाजपने स्पॉन्सर केलेलेच चित्रपट पाहायचे का?" असा परखड सवाल त्यांनी केला.
शांततेत आंदोलन करणाऱ्या विद्यार्थ्यांवर झालेल्या लाठीचार्जचा तीव्र निषेध करताना त्यांनी पोलिसांच्या गणवेशात पक्षाचे गुंड घुसून हंगामा केल्याचा आरोप केला. तसेच, बिघडलेल्या कायदा व सुव्यवस्थेवर बोलताना लॉरेन्स बिश्नोईसारख्या गुंडांना जेलमधून बाहेर काढून सार्वजनिकरीत्या चोपले पाहिजे, तरच कायद्याची योग्य भीती निर्माण होईल, असे मत त्यांनी मांडले. पुढे बोलताना ते म्हणाले की, "आपल्याकडे कायदा (Law) आहे, पण अंमलबजावणीची व्यवस्था (Order) नाही. माझा मुंबई आणि महाराष्ट्र पोलिसांच्या क्षमतेवर १०० टक्के विश्वास आहे. जर या पोलिस दलाला पूर्ण स्वातंत्र्य (Free Hand) दिले, तर ते राज्यातील क्राईम रेट शून्यावर आणून दाखवतील."
गेल्या काही वर्षांपासून देशात साचून राहिलेला असंतोष फार काळ लपून राहू शकणार नाही आणि एक ना एक दिवस प्रत्येक सामान्य नागरिकाचा हा राग बाहेर येईल, असा इशारा देत राज ठाकरेंनी पत्रकार परिषदेचा समारोप केला.