नाशिक, (प्रतिनिधी) १९ ऑक्टोबर - गुणवत्तेच्या आणि पात्रतेच्या आधारावर निवड झालेल्या एका महिलेला अंगणवाडी मदतनीस पदाचा नियुक्ती आदेश मिळवून दिल्याचा मोबदला म्हणून 'वरिष्ठांच्या नावाने' स्वतःसाठी १० हजार रुपयांची लाच स्वीकारणाऱ्या बालविकास प्रकल्प कार्यालयातील पर्यवेक्षिकेला नाशिक लाचलुचपत प्रतिबंधक विभागाने (ACB) रंगेहाथ पकडले. सोमवारी (दि. १९ ऑक्टोबर) सुरगाणा येथील एकात्मिक बालविकास सेवा योजना प्रकल्प कार्यालयात ही धडक सापळा कारवाई करण्यात आली.
हेमलता धवळू गाढवे (वय ५३) असे लाच स्वीकारताना रंगेहाथ पकडण्यात आलेल्या पर्यवेक्षिकेचे नाव आहे. शासकीय सेवेत नियुक्ती मिळूनही केवळ लाचखोर अधिकाऱ्यांच्या अडवणुकीमुळे होणाऱ्या छळाविरोधात तक्रारदाराने दाखवलेल्या धैर्याचे कौतुक होत असून, या कारवाईमुळे सुरगाणा तालुक्यातील प्रशासकीय आणि शासकीय वर्तुळात प्रचंड खळबळ उडाली आहे.
गुणवत्तेवर निवड, तरीही २० हजारांची मागणी
मिळालेल्या माहितीनुसार, तक्रारदार महिलेने सुरगाणा तालुक्यातील शिराटा येथील अंगणवाडी केंद्रात मदतनीस पदासाठी रीतसर अर्ज केला होता. सर्व निकष आणि गुणवत्तेच्या आधारावर त्यांची या पदासाठी निवड झाली. त्यानुसार बालविकास प्रकल्प अधिकाऱ्यांकडून ३० सप्टेंबर २०२६ रोजी त्यांना नियुक्तीचा अधिकृत आदेश प्राप्त झाला आणि त्या शिराटा येथील केंद्रावर मदतनीस म्हणून रुजू देखील झाल्या.
शिराटा अंगणवाडी केंद्र हे 'माणी बीट' अंतर्गत येते. या बीटच्या पर्यवेक्षिका म्हणून हेमलता गाढवे या कार्यरत होत्या. तक्रारदार महिला कामावर रुजू झाल्यानंतर गाढवे यांनी, "तुमची निवड मीच करून आणली आहे आणि तुम्हाला आदेश मिळवून दिला आहे," असा दावा केला. या कामाचा मोबदला म्हणून त्यांनी वरिष्ठांच्या नावाने स्वतःसाठी तब्बल २० हजार रुपयांच्या लाचेची मागणी तक्रारदार महिलेकडे केली.
तडजोडीअंती १० हजार ठरले; तक्रारदाराचे धाडस
स्वतःच्या हक्काच्या व गुणवत्तेच्या जोरावर नोकरी मिळूनही पर्यवेक्षिका गाढवे या बेकायदेशीर पैशांची मागणी करत असल्याने तक्रारदार महिलेने त्यांना धडा शिकवण्याचा निर्णय घेतला. लाच न देण्याचा पक्का निर्धार करून तक्रारदाराने १२ ऑक्टोबर २०२६ रोजी थेट नाशिक येथील लाचलुचपत प्रतिबंधक विभागाच्या (एसीबी) कार्यालयात जाऊन लेखी तक्रार नोंदवली.
तक्रार प्राप्त होताच एसीबीच्या पथकाने १२ ऑक्टोबर रोजीच सुरगाणा येथे जाऊन लाचेच्या मागणीची पडताळणी केली. पडताळणी दरम्यान, पर्यवेक्षिका हेमलता गाढवे यांनी तक्रारदाराकडे सुरुवातीला २० हजार रुपयांची मागणी केली होती; मात्र तडजोडीअंती १० हजार रुपये लाच स्वीकारण्याचे मान्य केले.
कार्यालयातच रचला सापळा
लाचेची मागणी पंचांसमक्ष सिद्ध झाल्यानंतर सोमवारी (दि. १९ ऑक्टोबर) एसीबीच्या पथकाने सुरगाणा येथील बालविकास प्रकल्प कार्यालयातच एन मोक्याच्या वेळी सापळा रचला. ठरल्याप्रमाणे तक्रारदार महिला लाचेची रक्कम देण्यासाठी कार्यालयात पोहोचली.
तक्रारदाराकडून १० हजार रुपयांची लाचेची रक्कम पंच साक्षीदारांच्या समक्ष स्वतः स्वीकारताना पर्यवेक्षिका हेमलता गाढवे यांना एसीबीच्या पथकाने रंगेहाथ ताब्यात घेतले. अचानक झालेल्या या कारवाईमुळे कार्यालयातील इतर कर्मचाऱ्यांची चांगलीच धांदल उडाली.
पोलीस ठाण्यात गुन्हा दाखल; एसीबीचे नागरिकांना आवाहन
या प्रकरणी लाचखोर पर्यवेक्षिका हेमलता गाढवे यांच्याविरोधात सुरगाणा पोलीस ठाण्यात (नाशिक ग्रामीण) भ्रष्टाचार प्रतिबंधक कायदा १९८८ च्या कलम ७ अन्वये गुन्हा दाखल करण्याची प्रक्रिया सुरू करण्यात आली आहे.
ही यशस्वी कारवाई नाशिक परिक्षेत्राचे पोलीस अधीक्षक भारत तांगडे, अपर पोलीस अधीक्षक प्रदीप मैराळे व कविता फडतरे यांच्या मार्गदर्शनाखाली करण्यात आली. सापळा अधिकारी म्हणून पोलीस निरीक्षक श्रीमती नेहा सूर्यवंशी यांनी काम पाहिले. तर पथकात पोलीस हवालदार विनोद चौधरी, पोलीस अंमलदार अनिल गांगोडे, योगेश शिंदे व चालक पोलीस हवालदार परशराम जाधव यांनी मोलाचे योगदान दिले. या गुन्ह्याचा पुढील तपास पोलीस उपअधीक्षक सुरेश शिरसाठ करत आहेत.
नागरिकांना आवाहन:
शासकीय कामासाठी किंवा कोणत्याही कायदेशीर लाभासाठी कोणताही अधिकारी अथवा कर्मचारी लाचेची मागणी करत असल्यास नागरिकांनी अजिबात न घाबरता लाचलुचपत प्रतिबंधक विभागाशी तात्काळ संपर्क साधावा.
नाशिक कार्यालय दूरध्वनी: ०२५३-२५७५६२८ / २५७८२३०
टोल फ्री क्रमांक: १०६४
व्हॉट्सॲप संपर्क: ९९३०९९७७०० / ९५४५०३१०६४
ई-मेल: spacbnasik@mahapolice.gov.in