नाशिक (प्रतिनिधी), १८ सप्टेंबर २०२६ -
राष्ट्रीयकृत बँकेत ठेवलेली सेवानिवृत्तीची रक्कम जास्त व्याजदराच्या आमिषाने फायनान्स कंपनीत गुंतवण्यास लावून एका भामट्याने वृद्ध दांपत्याला तब्बल ८६ लाखांचा गंडा घातल्याचा प्रकार समोर आला आहे. रक्कम हडपल्यानंतर संशयित कुटुंबासह फरार झाला असून, याप्रकरणी म्हसरूळ पोलीस ठाण्यात फसवणुकीचा गुन्हा दाखल करण्यात आला आहे.
विजय सुधाकर वाघमारे असे गुन्हा दाखल झालेल्या संशयिताचे नाव आहे. याप्रकरणी चंद्रभान सांडू परचुरे (वय ७४, रा. समृद्धी कॉलनी, दिंडोरी रोड) यांनी फिर्याद दिली आहे.
अशी घडली घटना
विश्वास संपादन :
संशयित विजय वाघमारे याने मे २०२३ मध्ये परचुरे यांची भेट घेतली. परचुरे यांच्याकडे सेवानिवृत्तीची मोठी पुंजी राष्ट्रीयकृत बँकेत जमा असल्याची माहिती मिळताच, वाघमारे याने त्यांच्या घरी जाऊन जवळीक साधली आणि त्यांचा विश्वास संपादन केला.
आमिष अन् चेक लाटले :
'फाईन सिक्युरिटी बँकेत' गुंतवणूक केल्यास भरघोस परतावा आणि अधिक व्याज देण्याचे आमिष त्याने दाखवले. १९ मे २०२३ ते १६ जुलै २०२६ या कालावधीत वाघमारे याने चंद्रभान परचुरे आणि त्यांच्या पत्नी पुष्पलता परचुरे यांच्याकडून वेळोवेळी धनादेश (चेक्स) घेत ८६ लाख १ हजार ४७ रुपये लाटले.
बनावट स्टेटमेंटने दिशाभूल :
परचुरे यांनी गुंतवणुकीच्या प्रमाणपत्राची मागणी केली असता, संशयिताने 'इन्डोशियल बँकेचे' बनावट बँक स्टेटमेंट तयार करून त्यावर खोटे सही-शिक्के मारून त्यांची दिशाभूल केली.
रक्कम परत मिळत नसल्याचे आणि फसवणूक झाल्याचे लक्षात येताच परचुरे यांनी पैशांचा तगादा लावला. त्यानंतर संशयित वाघमारे याने कुटुंबासह शहरातून पळ काढला. आपली फसवणूक झाल्याचे निश्चित झाल्यानंतर परचुरे दांपत्याने म्हसरूळ पोलीस ठाणे गाठून तक्रार नोंदवली. पोलीस सध्या फरार संशयिताचा शोध घेत आहेत.
