नाशिक, (प्रतिनिधी) १५ सप्टेंबर - कौटुंबिक वाद मिटवण्याचे गाजर दाखवून एका महिलेला निर्जन स्थळी नेऊन तिचा विनयभंग केल्याची संतापजनक घटना समोर आली आहे. या प्रकरणी पीडित महिलेच्या तक्रारीवरून नाशिकमधील आडगाव पोलीस ठाण्यात पतीसह त्याच्या दोन मित्रांवर गुन्हा दाखल करण्यात आला आहे.
घटनेचा सविस्तर तपशील:
पोलीस सूत्रांनी दिलेल्या माहितीनुसार, प्रदीप बोडके, प्रमोद बोडके आणि प्रवीण सांगळे अशी गुन्हा दाखल करण्यात आलेल्या संशयितांची नावे असून, त्यातील एक पीडितेचा पती आहे. कौटुंबिक वादामुळे पीडित महिला पतीपासून विभक्त राहत होती.
गेल्या २४ ऑगस्ट रोजी संशयितांनी पीडित महिलेशी संपर्क साधला. पती-पत्नीतील आपापसातील वाद मिटवायचे आहेत, असे सांगून रात्री ८ वाजेच्या सुमारास त्यांनी महिलेला नांदूरनाका परिसरात बोलावून घेतले.
निर्जन स्थळी नेऊन कृत्य:
'कुठे तरी शांत ठिकाणी बसून चर्चा करू' असे सांगत संशयितांनी महिलेला एका स्विफ्ट कारमध्ये (MH 05 CV 7521) बसवले. त्यानंतर त्यांनी गाडी नांदूरनाका ते तपोवन रोडवरील सिटी लिंक बस डेपोजवळील एका निर्जन स्थळी थांबवली.
तिथे चर्चा सुरू असताना पतीने त्याच्या प्रेमप्रकरणाची कुठेही वाच्यता करू नये, असा दबाव महिलेवर आणला. मात्र, महिलेने त्याला विरोध करत वाच्यता करणारच असे ठामपणे सांगितले. यामुळे संतप्त झालेल्या पतीने महिलेचा गळा दाबून तिला मारण्याचा प्रयत्न केला. तर, सोबत असलेल्या दोघा मित्रांनी तिला अश्लील व अर्वाच्च भाषेत शिवीगाळ केली आणि त्यातील एकाने तिचा विनयभंग केला.
या धक्कादायक घटनेप्रकरणी आडगाव पोलिसांत गुन्हा दाखल करण्यात आला असून, पुढील तपास महिला पोलीस उपनिरीक्षक योगिता पाटील करत आहेत.
