नाशिक, (प्रतिनिधी) १५ सप्टेंबर - नाशिकचे जिल्हाधिकारी आयुष प्रसाद यांच्या नाव, पद आणि छायाचित्राचा गैरवापर करून अज्ञात सायबर भामट्याने बनावट 'व्हॉट्सॲप बिझनेस अकाउंट' (WhatsApp Business Account) तयार केल्याचा धक्कादायक प्रकार समोर आला आहे. या अकाउंटवरून नागरिकांना मेसेज पाठवून फसवणुकीचा प्रयत्न केला जात असून, जिल्हा प्रशासनाने नागरिकांना या संशयास्पद नंबरला कोणताही प्रतिसाद न देण्याचे कडक आवाहन केले आहे.
कसा होतोय फसवणुकीचा प्रयत्न?
सायबर गुन्हेगाराने व्हॉट्सॲपवर जिल्हाधिकाऱ्यांचा फोटो आणि 'Ayush Prasad' नाव वापरून बिझनेस प्रोफाइल तयार केले आहे.
बनावट व्हॉट्सॲप नंबर: +66 92 455 6074 (थायलंडचा आंतरराष्ट्रीय कोड)
पाठवले जाणारे मेसेज: या नंबरवरून "Hello… How are you doing… Where are you at the moment?" अशा स्वरूपाचे मेसेज पाठवून नागरिकांना जाळ्यात ओढण्याचा प्रयत्न केला जात आहे.
जिल्हा प्रशासन आणि पोलिसांचे महत्त्वाचे आवाहन
१. प्रतिसाद देऊ नका: सदर थायलंडच्या नंबरवरून (+66 92 455 6074) फोन किंवा मेसेज आल्यास त्याला अजिबात उत्तर देऊ नका.
२. गोपनीय माहिती शेअर करू नका: या नंबरवर किंवा अशा कोणत्याही संशयास्पद अकाउंटवर आपली वैयक्तिक माहिती, कागदपत्रे, बँक तपशील, पासवर्ड किंवा ओटीपी (OTP) शेअर करू नका.
३. आर्थिक व्यवहार टाळा: जिल्हाधिकारी किंवा कोणत्याही अधिकाऱ्याच्या नावाने पैशांची मागणी झाल्यास ती पूर्णपणे सायबर फ्रॉडची शक्यता असते.
४. खातरजमा करा: जिल्हा प्रशासन किंवा इतर कोणत्याही शासकीय विभागाच्या नावाने सोशल मीडियावर मेसेज आल्यास अधिकृत सूत्रांकडून शहानिशा करा.
या प्रकरणाची दखल घेत बनावट अकाउंट चालवणाऱ्या सायबर भामट्याचा शोध घेण्यासाठी आवश्यक ती कायदेशीर कारवाई सुरू करण्यात आली आहे. नागरिकांनी सतर्क राहून संशयास्पद हालचाली आढळल्यास त्वरित पोलिसांशी संपर्क साधावा, असे स्पष्ट करण्यात आले आहे.
