नाशिक, (प्रतिनिधी) १४ सप्टेंबर - कौटुंबिक वादातून पतीने आपल्या पत्नीस जीवे मारण्याचा प्रयत्न केल्याची भीषण घटना पंचवटी आणि आडगाव परिसरात घडली आहे. पतीने पत्नीला विषारी औषध पाजून भररस्त्यात सोडून दिल्यानंतर हा प्रकार उघडकीस आला असून, याप्रकरणी आडगाव पोलीस ठाण्यात गंभीर गुन्हा दाखल करण्यात आला आहे.
नेमकी घटना काय?
पीडित महिलेने दिलेल्या फिर्यादीनुसार, गेल्या सहा वर्षांपासून तिचा पती तिचा सतत शारीरिक व मानसिक छळ करत आहे. पैसे दिले नाहीत या कारणावरून शनिवारी (दि. १२) संशयित पतीने महिलेला बेदम मारहाण केली. त्यानंतर दुसऱ्या दिवशी (रविवारी) पुन्हा भांडणाची कुरापत काढून, "तू माहेरी का गेली नाही?" असे म्हणत त्याने वाद घातला.
वाद विकोपाला गेल्याने संतप्त पतीने महिलेच्या छातीवर पाय ठेवून तिचा गळा आवळला. एवढ्यावरच न थांबता, "आता विषय संपवितो" असे म्हणत त्याने कोयत्याचा धाक दाखवून तिला जबरदस्तीने विषारी औषध पाजले.
अपघाताचा बनाव आणि रस्त्यात सोडून पळ काढला
विष पाजल्यानंतर पतीने, "तुझा अपघातात बळी देतो" असे सांगत तिला सुसाट वेगात आपल्या वाहनात बसवून परिसरातून फिरवले. प्रकृती खालावल्यानंतर आरोपीने लोकमान्य हॉस्पिटल भागात तिला रस्त्यावरच सोडून दिले आणि तिथून पळ काढला. या घटनेची माहिती मिळताच हा प्रकार पोलिसांपर्यंत पोहोचला.
याप्रकरणी पीडितेच्या तक्रारीवरून पोलिसांनी गुन्हा दाखल केला असून, पुढील तपास उपनिरीक्षक संदीप ठाकरे करीत आहेत. दिवसेंदिवस वाढणाऱ्या घरगुती हिंसाचाराच्या या घटनेमुळे परिसरात तीव्र संताप व्यक्त होत आहे.
