नाशिक, (प्रतिनिधी) १४ सप्टेंबर - पाकिस्तानमधून होणाऱ्या बेकायदेशीर आयातीविरोधात महसूल गुप्तचर संचालनालयाने (DRI) एक मोठी आणि यशस्वी कारवाई केली आहे. 'ऑपरेशन डीप मॅनिफेस्ट' (Operation Deep Manifest) अंतर्गत नाशिक येथील 'सीएफएस अंबड' (CFS Ambad) येथे धाड टाकून अधिकाऱ्यांनी तब्बल ३६२ मेट्रिक टनांहून अधिक सुका खजूर जप्त केला आहे. आंतरराष्ट्रीय व्यापारबंदीला बगल देऊन संयुक्त अरब अमिरातीमार्गे (UAE) हा माल भारतात आणण्याचा प्रयत्न केला जात होता.
जेबेल अलीमार्गे 'ट्रान्सशिपमेंट'चा बनाव
डीआरआयला मिळालेल्या गुप्त माहितीच्या आधारे नाशिकच्या सीएफएस अंबड येथे मुंबईस्थित एका कंपनीचे १३ कंटेनर अडवण्यात आले. आयात कागदपत्रांमध्ये या मालाचा उगम 'संयुक्त अरब अमिराती' (UAE) असा दाखवण्यात आला होता. मात्र, प्राथमिक तपासात आंतरराष्ट्रीय तस्करीचे एक मोठे नेटवर्क उघडकीस आले.
हा सुका खजूर मूळचा पाकिस्तानमधील कराची बंदरातून 'जेबेल अली' (UAE) येथे नेण्यात आला. तेथे केवळ कागदोपत्री फेरफार आणि कंटेनर बदलून (Transshipment) हा माल नव्या जहाजाद्वारे भारताकडे रवाना करण्यात आला होता. या संपूर्ण रॅकेटमध्ये पाकिस्तानी नागरिकांद्वारे संचलित संस्थांचा सहभाग असल्याचे तपासात समोर आले आहे.
राष्ट्रीय सुरक्षेच्या पार्श्वभूमीवर बंदी
पहलगाम येथे झालेल्या दहशतवादी हल्ल्यानंतर भारत सरकारने राष्ट्रीय सुरक्षेचा विचार करता पाकिस्तानमधून थेट किंवा अप्रत्यक्षपणे येणाऱ्या सर्व वस्तूंच्या आयातीवर पूर्णपणे बंदी घातली आहे. परराष्ट्र व्यापार महासंचालनालयाच्या (DGFT) २ मे २०२५ च्या अधिसूचनेनुसार ही बंदी लागू करण्यात आली आहे.
डीआरआयचा तस्करीच्या नेटवर्कला झटका
चुकीची माहिती देणे, कागदपत्रांमध्ये फेरफार करणे आणि तिसऱ्या देशाचा वापर करून व्यापारबंदी चुकवणाऱ्या आंतरराष्ट्रीय रॅकेटचा पर्दाफाश करण्यासाठी डीआरआय कटिबद्ध आहे. नाशिकमध्ये झालेली ही कारवाई राष्ट्रीय सुरक्षेचे रक्षण आणि पुरवठा साखळीची पारदर्शकता टिकवून ठेवण्याच्या दृष्टीने अत्यंत महत्त्वाची मानली जात आहे. या प्रकरणी पुढील तपास तीव्र गतीने सुरू आहे.
