नाशिक, (प्रतिनिधी) १० सप्टेंबर - नाशिकरोड बसस्थानकाच्या जागेचे काँक्रीटीकरणाचे काम हाती घेण्यात आले आहे. या कामासाठी बसस्थानकाची जागा बुधवार (दि. ९ सप्टेंबर २०२६) पासून पुढील तीन महिन्यांच्या कालावधीसाठी ठेकेदारास वर्ग करण्यात आली आहे. त्यामुळे नाशिक महानगर परिवहन महामंडळ लि. (सिटीलिंक) शहर बससेवेच्या वाहतूक मार्गात तात्पुरत्या स्वरूपात बदल करण्यात आला आहे.
हा सुधारित वाहतूक मार्ग गुरुवार (दि. १० सप्टेंबर २०२६) पासून लागू करण्यात येत आहे.
अशी असेल नवीन वाहतूक व्यवस्था:
कोणताही बदल नाही (पूर्ववत मार्ग):
नाशिकरोड रेल्वे स्टेशन ते त्र्यंबकेश्वर (येणाऱ्या-जाणाऱ्या बसेस)
नाशिकरोड रेल्वे स्टेशन ते दिंडोरी (येणाऱ्या-जाणाऱ्या बसेस)
(वरील दोन्ही मार्गांवरील बस वाहतूक नेहमीप्रमाणेच रेल्वे स्टेशनवरून सुरू राहील.)
नागरी आगारामार्फत चालणारे सुधारित मार्ग:
नाशिकरोड रेल्वे स्टेशनवरून सुटणाऱ्या इतर सर्व प्रमुख मार्गांवरील बसेस आता रेल्वे स्टेशनऐवजी नाशिकरोड आगारातून (डेपो) सोडण्यात येतील व तेथेच समाप्त होतील.
बाधित मार्ग: बारदान फाटा, सिम्बायोसिस, अंबड, ओझर गाव, हिंगणवेडा, एकलहरे, म्हाडा, गंगापूर गाव, ओझर एअरफोर्स आणि बोरगड.
प्रवाशांना आवाहन:
वाहतूक मार्गातील या बदलांमुळे प्रवाशांना होणाऱ्या तात्पुरत्या गैरसोयीबद्दल सिटीलिंक प्रशासनाने दिलगिरी व्यक्त केली आहे. प्रवाशांनी या बदलांची नोंद घेऊन त्यानुसार आपल्या प्रवासाचे नियोजन करावे, असे आवाहन महामंडळातर्फे करण्यात आले आहे.
