नाशिक, (प्रतिनिधी) ८ सप्टेंबर - अध्यात्म आणि ज्योतिषशास्त्राच्या नावाखाली महिलांचे लैंगिक शोषण व आर्थिक फसवणूक केल्याप्रकरणी अटकेत असलेला नाशिकचा स्वयंघोषित भोंदूबाबा अशोक खरात (उर्फ कॅप्टन खरात) याच्या अडचणीत आणखी वाढ झाली आहे. अंमलबजावणी संचालनालयाने (ED) या प्रकरणात मनी लाँड्रिंगचा (PMLA) गुन्हा दाखल करून तपास तीव्र केला आहे. ईडीच्या तपासात खरातचे परदेश दौरे, अमेरिकेतील महागडे वैद्यकीय उपचार आणि भक्तांच्या नावाचा वापर करून उघडण्यात आलेली बेनामी बँक खाती, असा आर्थिक गैरव्यवहाराचा मोठा कट उघडकीस आला आहे.
तपासातील महत्त्वाचे आणि धक्कादायक खुलासे:
भक्तांच्या नावावर बेनामी खाती:
तीर्थयात्रा, व्हीआयपी दर्शन आणि धार्मिक विधींच्या नावाखाली अशोक खरात भक्तांकडून आधार कार्ड, पॅन कार्ड व इतर कागदपत्रे गोळा करत असे. या कागदपत्रांचा गैरवापर करून त्यांच्या नकळत बँकांमध्ये बेनामी खाती उघडण्यात आली. विशेष म्हणजे, या बहुतांश खात्यांना स्वतः अशोक खरातचाच मोबाईल क्रमांक लिंक होता.
पती-पत्नी व सहकाऱ्यांच्या नावे २४ कोटींची उलाढाल:
'समता नागरी सहकारी पतसंस्थे'मध्ये खरातने भक्तांच्या नावे सुमारे ६० बचत खाती आणि ४८ विशेष बचत खाती उघडल्याचे समोर आले आहे. या खात्यांमध्ये तब्बल २१.२५ कोटी रुपयांची रोख रक्कम जमा करण्यात आली, तर २३.८७ कोटी रुपये काढून घेण्यात आले. संशय येऊ नये म्हणून प्रत्येक व्यवहार २ लाख रुपयांपेक्षा कमी रकमेचा ठेवण्यात आला होता.
पतसंस्थेच्या अध्यक्षपदाचा गैरवापर:
'जगदंबा माता ग्रामीण बिगर शेती सहकारी पतसंस्थे'मध्ये उपाध्यक्ष व अध्यक्ष असताना खरातने आपल्या पदाचा गैरवापर केला. येथे विविध व्यक्तींच्या नावे ३४ मुदत ठेव (FD) आणि चालू खाती उघडून १.८६ कोटी रुपये रोख जमा केले आणि ३.१८ कोटी रुपये मॅच्युरिटीच्या नावाने स्वतःकडे वळवले.
अमेरिकेत महागडे उपचार आणि परदेश दौरे:
खरातच्या परदेश वाऱ्या आणि अमेरिकेतील प्रसिद्ध 'मेयो क्लिनिक' (Mayo Clinic) मधील महागड्या वैद्यकीय उपचारांचा खर्च पुण्यातील एका मोठ्या उद्योगपतीने (राजेंद्र जासूद) उचलल्याचे तपासात निष्पन्न झाले आहे.
नेमके प्रकरण काय आहे?
माजी मर्चंट नेव्ही ऑफिसर असलेला अशोक खरात याने नाशिक आणि परिसरात ज्योतिषाच्या नावाखाली स्वतःचे जाळे पसरवले होते. डिझेल-पेट्रोलच्या नावाने आणि धार्मिक विधींच्या बहाण्याने त्याने अनेक भक्तांची कोट्यवधी रुपयांची फसवणूक केली. तसेच, एका विवाहित महिलेवर औषध देऊन व संमोहन करून अनेक वर्षे बलात्कार केल्याचा गंभीर आरोप त्याच्यावर आहे. याप्रकरणी नाशिक पोलिसांनी त्याला अटक केली असून, राज्य सरकारने यासाठी विशेष तपास पथक (SIT) स्थापन केले होते. आता या सर्व गुन्ह्यांमधून कमावलेला काळा पैसा कुठे आणि कसा गुंतवला गेला, याचा शोध 'ईडी' घेत आहे.
