नाशिक, (प्रतिनिधी) २ सप्टेंबर - भारतीय वायुदलाच्या शौर्याची आणि पराक्रमाची साक्ष देणारी दोन 'मिग-२१' (MiG-21) फायटर जेट विमाने लवकरच नाशिकमधील लेखानगर येथील ‘राष्ट्रभक्ती वाहतूक बेटावर’ दिमाखात उभारली जाणार आहेत. शिवसेना महानगरप्रमुख तथा नगरसेवक प्रवीण (बंटी) तिदमे यांच्या संकल्पनेतून हा नावीन्यपूर्ण उपक्रम साकारत असून, या प्रकल्पामुळे नाशिककरांमध्ये आणि विशेषतः युवा पिढीमध्ये राष्ट्रभक्तीची भावना अधिक दृढ होण्यास मदत होणार आहे.
रंगकाम व सुशोभीकरणाची प्रक्रिया सुरू
या उपक्रमासाठी आणण्यात आलेली दोन्ही ‘मिग-२१’ फायटर जेट विमाने सध्या लेखानगर परिसरात दाखल झाली असून, त्यांच्या रंगकामाचे व सुशोभीकरणाचे काम वेगाने सुरू आहे. येत्या दोन ते तीन महिन्यांत हे काम पूर्ण करून या दोन्ही विमानांचे 'राष्ट्रभक्ती वाहतूक बेटावर' अतिशय भव्य दिव्य स्वरूपात लोकार्पण करण्यात येणार आहे.
भारतीय वायुदलाच्या गौरवशाली इतिहासाचे साक्षीदार
'मिग-२१' हे भारतीय वायुदलाच्या इतिहासातील अत्यंत महत्त्वाचे आणि लढाऊ विमान मानले जाते. या विमानांनी अनेक ऐतिहासिक युद्धांत महत्त्वाची भूमिका बजावली आहे:
१९६५ आणि १९७१ चे भारत-पाकिस्तान युद्ध (विशेषतः १९७१ च्या युद्धात मिग-२१ चे योगदान निर्णायक ठरले).
१९९९ चे कारगिल युद्ध.
२०१९ मधील बालाकोट हवाई कारवाई.
"भारतीय सैन्याचे शौर्य, त्याग आणि राष्ट्रभक्तीचा वारसा नाशिककरांना आणि येणाऱ्या पिढीला नेहमी प्रेरित करत राहावा, याच उद्देशातून या प्रकल्पाची संकल्पना मांडली आहे. सुशोभीकरणाचे काम पूर्ण होताच हे फायटर जेट्स नागरिकांच्या अर्पण केले जातील."
— प्रवीण (बंटी) तिदमे (महानगरप्रमुख, शिवसेना नाशिक तथा नगरसेवक, प्रभाग २४, मनपा)
नाशिकच्या सौंदर्यात भर घालणाऱ्या आणि भारतीय लष्कराच्या पराक्रमाला सलाम करणाऱ्या या उपक्रमाचे नाशिककरांमधून मोठे कौतुक होत आहे.
