दीपकनाथ गांगुर्डे, (नाशिक) १४ ऑगस्ट - आगामी काळात संघटनात्मक बळकटी आणि पक्षबांधणीवर जोर देत काँग्रेस पक्षाकडून नाशिक येथे १० दिवसांच्या विशेष निवासी प्रशिक्षण शिबिराचे आयोजन करण्यात आले आहे. २४ ऑगस्ट ते २ सप्टेंबर या कालावधीत गंगापूर धरण परिसरातील MTDC पर्यटन केंद्रात हे शिबीर पार पडणार आहे. या शिबिराला काँग्रेस नेते खासदार राहुल गांधी स्वतः उपस्थित राहून देशभरातील जिल्हाध्यक्षांना मार्गदर्शन करणार आहेत.
राहुल गांधींचे नाशिक आणि त्र्यंबकेश्वर दौरे:
नाशिक दौऱ्यादरम्यान राहुल गांधी धार्मिक व अध्यात्मिक स्थळांना भेट देणार आहेत:
प्रभू श्रीराम दर्शन: नाशिक येथील ऐतिहासिक काळाराम मंदिरात जाऊन ते दर्शन घेतील.
भव्य गोदा आरती: रामकुंडावर सायंकाळच्या वेळी त्यांच्या हस्ते भव्य गोदा आरती पार पडेल.
त्र्यंबकेश्वर दर्शन: १२ ज्योतिर्लिंगांपैकी एक असलेल्या भगवान त्र्यंबकेश्वर मंदिरात जाऊन ते पूजा-अर्चन करतील.
कुंभमेळ्याच्या मुद्द्यावरून भाजपला धारेवर धरण्याची शक्यता:
नाशिक-त्र्यंबकेश्वर येथे होणाऱ्या आगामी सिंहस्थ कुंभमेळ्याच्या विकासकामांचा दर्जा, त्यातील अनियमितता आणि भ्रष्टाचार या मुद्द्यांवरून राहुल गांधी सत्ताधारी भाजप सरकारला आणि स्थानिक प्रशासनाला धारेवर धरण्याची दाट शक्यता वर्तवली जात आहे.
'संघटन सृजन अभियान' अन् प्रशिक्षणाचे स्वरूप:
अखिल भारतीय काँग्रेस कमिटीच्या प्रशिक्षण विभागाचे प्रमुख सचिन राव यांच्या नेतृत्वाखाली हे निवासी शिबीर होणार आहे.
'झेन झी' आंदोलनाचा प्रभाव: तरुणांच्या 'जेन झी' (Gen Z) आंदोलनाचा प्रभाव लक्षात घेऊन ‘नवी पिढी, नवे नेतृत्व आणि मजबूत संघटन’ या संकल्पनेवर प्रशिक्षणाची रचना करण्यात आली आहे.
मनरेगा अन् श्रमदान: केवळ बौद्धिक सत्रेच नव्हे, तर ग्रामीण वास्तव समजून घेण्यासाठी सर्व जिल्हाध्यक्ष दररोज श्रमदान करतील आणि 'मनरेगा' (MNREGA) च्या प्रत्यक्ष कामाचा अनुभव घेतील.
प्रमुख मार्गदर्शक: राष्ट्रीय वॉररूम अध्यक्ष खा. शशिकांत सेंथिल हे सलग ३ दिवस विशेष सत्रे घेतील. याशिवाय प्रदेशाध्यक्ष हर्षवर्धन सपकाळ आणि इतर वरिष्ठ नेते तसेच विविध क्षेत्रांतील तज्ज्ञ अभ्यासक संवाद साधतील.
पक्षाची विचारधारा, संघटनात्मक कौशल्य, जनतेशी थेट संपर्क आणि देशपातळीवरील आव्हानांचा सामना करण्यासाठी हे प्रशिक्षण शिबीर काँग्रेससाठी अत्यंत महत्त्वाचे मानले जात आहे.
