एस.के. खेडकर, (नाशिक) १३ ऑगस्ट - स्वातंत्र्यदिनाच्या बंदोबस्ताच्या पार्श्वभूमीवर नाशिक ग्रामीण पोलिसांनी गुन्हेगारीविरुद्ध अत्यंत मोठी व धडक कारवाई करत बनावट चलनाची (फेक करन्सी) छपाई करणाऱ्या आंतरराज्य टोळीचा भांडाफोड केला आहे. त्र्यंबकेश्वर तालुक्यातील तळेगाव शिवारातील एका अलिशान बंगल्यात सुरू असलेल्या बनावट नोटांच्या कारखान्यावर पोलिसांनी संयुक्त छापा टाकला. या कारवाईत तेलंगणातील दोन मुख्य सूत्रधारांसह नाशिकमधील तीन अशा एकूण ५ आरोपींना रंगेहात अटक करण्यात आली आहे. आरोपींकडून ९ लाख ७५ हजार रुपयांच्या ५०० रुपयांच्या खऱ्या नोटा, बनावट नोटा बनवण्याचे केमिकल, कोऱ्या कागदांचे बंडल, साधनसामग्री, चारचाकी वाहन व मोबाईल असा एकूण १२,१९,५८० रुपये किंमतीचा मुद्देमाल जप्त करण्यात आला आहे.
गोपनीय बातमी आणि पोलिसांची कारवाई:
दिनांक १२ ऑगस्ट २०२६ रोजी नाशिक ग्रामीण पोलिसांना गुप्त बातमीदाराकडून पक्की माहिती मिळाली होती की, तळेगाव शिवारातील हिरामण दाते यांच्या बंगल्यात (गट क्र. १०५) काही संशयित इसम बेकायदेशीरपणे बनावट नोटा तयार करत आहेत. या माहितीच्या आधारे नाशिक ग्रामीण स्थानिक गुन्हे शाखा (LCB), नाशिक शहर पोलीस आणि त्र्यंबकेश्वर पोलीस ठाण्याच्या संयुक्त पथकाने फॉरेन्सिक टीमसह सदर बंगल्यावर छापा टाकला.
अटक करण्यात आलेले ५ आरोपी:
१. अमरेश्वर सुधाकर आईथा (वय ३७, रा. अनंर पेठ, प्रेमनगर, हैदराबाद, तेलंगणा)
२. दासहरी प्रसाद सत्यई (वय ३६, रा. गोल्लापल्ली, यल्लारेड्डी, जि. सिरसिला, तेलंगणा)
३. गोकुळ आनंदराव दाते (वय ५६, रा. सिद्धीपार्क, ध्रुवनगर, गंगापूर रोड, नाशिक; मूळ रा. तळेगाव, त्र्यंबकेश्वर)
४. हिरामण पुंजा दाते (वय ५६, रा. तळेगाव गट नं. १०५, ता. त्र्यंबकेश्वर, जि. नाशिक)
५. मच्छिंद्र भगवान घनदाट (रा. घाटोळ गल्ली, सातपूर, नाशिक)
जप्त करण्यात आलेला मुद्देमाल (एकूण ₹ १२,१९,५८०/-):
रोख रक्कम: ₹ ९,७५,०००/- (५०० रुपये दराच्या १,९५० मूळ खऱ्या नोटा)
छपाई साहित्य: नोटांच्या आकाराचे कोऱ्या कागदांचे बंडल
केमिकल व साधने: नोटा छापण्यासाठी लागणारे विशेष केमिकल व उपकरणे
इतर वस्तू: चारचाकी वाहन व मोबाईल फोन
गुन्हा नोंद व पुढील तपास:
सदर प्रकरणी त्र्यंबकेश्वर पोलीस ठाण्यात गु.र.नं. १४२/२०२६ अंतर्गत भारतीय न्याय संहिता (BNS) कलम १७८, १८०, १८१, १८२, ३(५) प्रमाणे गंभीर गुन्हा दाखल करण्यात आला आहे. हे आरोपी बनावट नोटा कुठे चालवणार होते आणि यात आणखी कोणाचा सहभाग आहे, याचा सखोल तपास त्र्यंबकेश्वर पोलीस करीत आहेत.
