नाशिक, (प्रतिनिधी) १२ ऑगस्ट - देवळाली गावातील सुंदरनगर परिसरात दारू पिण्यासाठी पैसे दिले नाही या कारणावरून एका तरुणावर कोयत्याने प्राणघातक हल्ला करून त्याला लुटल्याची धक्कादायक घटना समोर आली आहे. या घटनेत तरुण गंभीर जखमी झाला असून, संशयितांनी त्याच्या खिशातील रोख रक्कम हिसकावून घेत 'पोलीस तक्रार केल्यास जीवे मारू' अशी धमकी दिली आहे. या प्रकरणी उपनगर पोलीस ठाण्यात गुन्हा दाखल करण्यात आला आहे.
नेमकी घटना काय?
फिर्यादी खंडू प्रभाकर नागरे (वय २६, रा. तरणतलाव, रेणुकादेवी मंदिर, नाशिकरोड) हे मंगळवारी (दि. ११) दुपारी देवळाली गावातील सुंदरनगर भागात जात होते. त्यावेळी इलियास गुलाब भोख (रा. सुंदरनगर, देवळाली गाव) आणि त्याच्या दोन साथीदारांनी नागरे यांची वाट अडवली. संशयितांनी नागरे यांच्याकडे दारू पिण्यासाठी पैशांची मागणी केली. मात्र, नागरे यांनी पैसे देण्यास स्पष्ट नकार दिला.
कोयत्याने हल्ला आणि लुटमार
पैसे देण्यास नकार दिल्याने संशयित संतप्त झाले. त्यांनी नागरे यांना शिवीगाळ करत लाथाबुक्यांनी बेदम मारहाण केली. एवढ्यावरच न थांबता, इलियास याने आपल्या दुचाकीची डिक्की उघडून धारदार कोयता काढला आणि नागरे यांच्यावर वार केले. या हल्ल्यात नागरे रक्तबंबाळ होऊन जमिनीवर कोसळले. यावेळी संशयितांनी त्यांच्या खिशातील ३०० रुपये बळजबरीने काढून घेतले.
जाता जाता संशयितांनी, "जर तू पोलिसांत तक्रार केलीस, तर तुला जीवे मारू," अशी धमकी दिली आणि ते पसार झाले. या घटनेनंतर घाबरलेल्या नागरे यांनी उपनगर पोलीस ठाण्यात धाव घेऊन तक्रार दाखल केली. या प्रकरणी उपनिरीक्षक विशाल सपकाळे अधिक तपास करत आहेत.
