नवी दिल्ली, (प्रतिनिधी) १० ऑगस्ट - फुकेत (थायलंड) ते दिल्ली दरम्यान प्रवास करणाऱ्या एअर इंडियाच्या विमानाला उड्डाणादरम्यान मोठ्या अपघाताचा सामना करावा लागला. ४ ऑगस्ट रोजी 'एआय २३७९' या उड्डाणादरम्यान एअर इंडियाचे ए-३२० (VT-EXO) हे विमान प्रवासाच्या मुख्य टप्प्यावर अचानक ३०० फुटांनी खाली आले. मात्र, वैमानिकांनी प्रसंगावधान राखत विमानावर नियंत्रण मिळवले आणि दिल्लीत सुरक्षित लँडिंग केले.
प्रवासी आणि कर्मचारी जखमी
विमान अचानक खाली आल्याने झालेल्या धक्क्यामुळे विमानातील काही प्रवासी आणि विमान कर्मचारी (केबिन क्रू) जखमी झाले आहेत. या विमानात ३ नवजात बालकांसह १३७ प्रवासी, २ वैमानिक आणि ६ केबिन क्रू असे एकूण १४५ जण प्रवास करत होते.
वैमानिकांच्या चाचणीबाबत संशय; दोन्ही वैमानिक निलंबित
घटनेनंतर मानक कार्यपद्धतीनुसार दोन्ही वैमानिकांची अमली पदार्थ सेवन (सायकोअॅक्टिव्ह ड्रग्ज) तपासणी करण्यात आली. प्राथमिक अहवालात एका वैमानिकाच्या चाचणीबाबत अधिक पडताळणीची गरज असल्याचे समोर आले आहे. त्यामुळे नमुने पुनर्विशलेषणासाठी अधिकृत प्रयोगशाळेत पाठवण्यात आले असून अंतिम अहवालाची प्रतीक्षा आहे. नागरी विमान वाहतूक महासंचालनालयाने (DGCA) चौकशी पूर्ण होईपर्यंत दोन्ही वैमानिकांना तातडीने कर्तव्यावरून हटवले आहे.
विमान अपघात तपास विभागाकडून (AAIB) चौकशी
या घटनेची गांभीर्याने दखल घेत विमान अपघात तपास विभागाने (AAIB) सखोल चौकशी सुरू केली आहे. दुसऱ्या चाचणीचा निकाल आणि तपासाच्या निष्कर्षाच्या आधारे पुढील कठोर कारवाई केली जाईल, असे प्रशासनाने स्पष्ट केले आहे. नागरी विमान वाहतूक मंत्रालय आणि DGCA ने हवाई सुरक्षेच्या सर्वोच्च मानकांचे पालन केले जाईल, अशी ग्वाही दिली आहे.
