मुंबई, (प्रतिनिधी) २ ऑगस्ट - राज्यांची आर्थिक स्थिती मजबूत करत विविध विकास प्रकल्पांना गती देण्यासाठी केंद्र सरकारने आज एक मोठा आणि महत्त्वपूर्ण निर्णय घेतला आहे. केंद्र सरकारने सर्व राज्यांना मिळून १ लाख ९ हजार कोटी रुपयांच्या कर वितरणाचा अतिरिक्त अग्रीम हप्ता वितरित केला आहे. या राज्यनिहाय वाटपामध्ये महाराष्ट्राच्या वाट्याला ७ हजार २२ कोटी रुपयांचा अतिरिक्त निधी आला आहे.
नियमित हप्त्याव्यतिरिक्त अतिरिक्त आर्थिक बळ
विशेष म्हणजे, केंद्र सरकारकडून १० ऑगस्ट रोजी होणाऱ्या नियमित मासिक कर हस्तांतरणाव्यतिरिक्त (Regular Monthly Tax Devolution) हा अतिरिक्त निधी जाहीर करण्यात आला आहे. सण-उत्सव आणि आगामी विकासकामांच्या पार्श्वभूमीवर हा निधी मिळाल्यामुळे राज्यांच्या तिजोरीला मोठा दिलासा मिळाला आहे.
निधीचा असा होणार फायदा:
पायाभूत सुविधांना गती: राज्यातील रस्ते, वाहतूक आणि मोठ्या प्रकल्पांच्या उभारणीसाठी आवश्यक आर्थिक तरतूद करणे सोपे होणार आहे.
भांडवली खर्च आणि नियोजन: राज्याला आपल्या प्राधान्यक्रमाच्या लोककल्याणकारी योजनांसाठी निधीचे सक्षम नियोजन करता येईल.
प्रकल्पांची अमलबजावणी: निधीच्या अभावामुळे रडखडलेल्या अथवा धीम्या गतीने सुरू असलेल्या विकासकामांना आता अधिक गती मिळेल.
महाराष्ट्राला प्राप्त झालेल्या या ७,०२२ कोटी रुपयांमुळे राज्यातील विकासप्रकल्प वेगाने पूर्ण होण्यास मदत होणार आहे.
