नाशिक, (प्रतिनिधी) २८ जुलै - स्पाईस जेट या प्रसिद्ध विमान कंपनीत थेट नोकरी मिळवून देण्याचे आमिष दाखवून एका सुशिक्षित बेरोजगाराची तब्बल ४ लाख ४५ हजार ७८९ रुपयांची फसवणूक केल्याचा गंभीर प्रकार नाशिकमध्ये समोर आला आहे. बनावट नियुक्तीपत्र आणि ट्रेनिंग लेटर देऊन ही फसवणूक करण्यात आली असून, याप्रकरणी अंबड पोलीस ठाण्यात तिघा भामट्यांविरुद्ध गुन्हा दाखल करण्यात आला आहे.
वर्क इंडिया कंपनीचा प्रतिनिधी असल्याचे भासवले
मोरवाडीगाव (सिडको) येथील गजानन हरिभाई श्रीपतराव (वय ३५) हे तरुण सोशल मीडियावर नोकरीचा शोध घेत होते. ६ एप्रिल रोजी 'दीपक भोसले' नावाच्या व्यक्तीने त्यांच्याशी मोबाईलवर संपर्क साधला. आपण 'वर्क इंडिया' कंपनीतून बोलत असल्याचे सांगून त्याने सौरभ जाखव आणि अमोल सोनवणे या दोघांशी गजानन यांची ओळख करून दिली. हे दोघे 'स्पाईस जेट' कंपनीत वरिष्ठ अधिकारी असून थेट नोकरभरती करत असल्याचे भासवून गजानन यांचा विश्वास संपादन करण्यात आला.
बनावट नियुक्तीपत्र देऊन उकळले लाखो रुपये
नोकरीच्या आशेने गजानन यांनी संशयितांशी चर्चा केली असता, तिघांनी त्यांना 'स्पाईस जेट'मध्ये नोकरी मिळवून देण्याची पक्की ग्वाही दिली. ८ एप्रिल ते २८ मे या कालावधीत संशयितांनी प्रक्रियेच्या नावाने टप्प्याटप्प्याने गजानन यांच्याकडून एकूण ४ लाख ४५ हजार ७८९ रुपये उकळले. पैसे घेतल्यानंतर संशयितांनी गजानन यांच्या मोबाईलवर नियुक्तीपत्र (Appointment Letter), गेट पास आणि ट्रेनिंग लेटर पाठवले. मात्र, ही सर्व कागदपत्रे पूर्णपणे बनावट असल्याचे स्पष्ट होताच आपली फसवणूक झाल्याचे गजानन यांच्या लक्षात आले.
अंबड पोलिसात गुन्हा दाखल
आपली फसवणूक झाल्याचे समजताच गजानन श्रीपतराव यांनी तत्काळ अंबड पोलीस ठाण्यात धाव घेऊन तक्रार नोंदवली. पोलिसांनी दीपक भोसले, सौरभ जाखव आणि अमोल सोनवणे या तिघांविरुद्ध फसवणुकीचा गुन्हा दाखल केला असून, पोलीस निरीक्षक गडविनकेरी या प्रकरणाचा पुढील तपास करत आहेत.
