नाशिक, (प्रतिनिधी) १६ जुलै - शहरात धारदार शस्त्रे बाळगून दहशत माजवणाऱ्या गुन्हेगारांविरुद्ध पोलिसांनी कडक पावले उचलण्यास सुरुवात केली आहे. वेगवेगळ्या भागात पोलिसांनी धाडसी कारवाया करत तीन शस्त्रधाऱ्यांच्या मुसक्या आवळल्या आहेत. अटक करण्यात आलेल्या त्रिकुटाकडून धारदार दोन कोयते आणि एक चॉपर जप्त करण्यात आला आहे. याप्रकरणी अंबड आणि सातपूर पोलीस ठाण्यात शस्त्रबंदी कायद्यान्वये (Arms Act) गुन्हे दाखल करण्यात आले आहेत.
पहिली कारवाई: संभाजी स्टेडियम परिसरात चॉपरसह तरुण गजाआड
अंबड पोलिसांना मिळालेल्या गोपनीय माहितीनुसार, संभाजी स्टेडियम परिसरात एक तरुण धारदार चॉपर घेऊन फिरत होता. सोमवारी (दि. १३) रात्री गुन्हे शोध पथकाने स्टेडियमच्या पाठीमागील बाजूला सापळा रचून राकेश अनिल मिस्तरी (वय २३, रा. दत्तमंदिराजवळ, मोरवाडी) या संशयिताला ताब्यात घेतले. त्याची अंगझडती घेतली असता त्याच्याकडे लोखंडी चॉपर आढळून आला. याप्रकरणी पोलीस अंमलदार जाधव यांनी दिलेल्या फिर्यादीवरून गुन्हा दाखल करण्यात आला असून, हवालदार गांगुर्डे पुढील तपास करत आहेत.
दुसरी कारवाई: टपारिया कंपनीजवळ कोयता जप्त
सातपूर औद्योगिक वसाहतीतील टपारिया कंपनी परिसरात मंगळवारी (दि. १४) रात्री सातपूर पोलिसांनी दुसरी कारवाई केली. खबऱ्याने दिलेल्या अचूक माहितीच्या आधारे पोलिसांनी परिसरातून गणेश अमर बहादूर बोरा (वय २२, रा. गणेश नंदन अपार्टमेन्ट, अहिल्याबाई होळकर चौक, शिवाजीनगर, सातपूर) याला ताब्यात घेतले. त्याच्या अंगझडतीत धारदार लोखंडी कोयता जप्त करण्यात आला. याप्रकरणी पोलीस अंमलदार पारस देशमुख यांनी फिर्याद दिली आहे.
तिसरी कारवाई: एएसआय मैदानावर दुसऱ्या शस्त्रधाऱ्याच्या मुसक्या आवळल्या
तिसरी कारवाई देखील सातपूर पोलिसांच्या पथकाने मंगळवारी (दि. १४) रात्रीच त्र्यंबक रोडवरील एएसआय मैदान परिसरात केली. या ठिकाणी संशयास्पद रितीने वावरत असलेल्या प्रवीण शांताराम शिंदे (वय २९, रा. लोटस अपार्टमेन्ट, गुलमोहर कॉलनी, ध्रुवनगर) याला पोलिसांनी बेड्या ठोकल्या. त्याच्या झडतीतही एक धोकादायक लोखंडी कोयता हस्तगत करण्यात आला आहे. याप्रकरणी पोलीस अंमलदार दराडे यांनी फिर्याद दिली आहे.
सातपूर येथील दोन्ही गुन्ह्यांचा पुढील तपास पोलीस हवालदार देसले करत आहेत. पोलिसांच्या या लागोपाठ कारवायांमुळे भाईगिरी करणाऱ्यांमध्ये घबराट पसरली आहे.
